Maman!© – 02-09 – I SBILFS

Maman! La trasmission par fruts dute in lenghe furlane
In onde su Telefriuli (canâl 11) ogni vinars

Une produzion di ARLeF – Agjenzie Regjonâl pe Lenghe Furlane e di Telefriuli

Intune cjasute plene di colôrs a vivin Daria e il gjatut Vigji. Ogni dì e ven a cjatâju la lôr amie Chiara e ancje Siôr Timp, un personaç une vore stravagant: insiemi a passin dopodimisdîs une vore divertents là che a cjantin, a zuin, a contin barzaletis e a lein contis.

In cheste pontade: I sbilfs (9). Chiara e va a cjase di Daria che e je daûr a scoltâ un toc tant biel: “Il Guriut”, sunât dal grup musicâl dai “No si sa”. I Guriuts a son folets, parincj dai Sbilfs, a son a stâ a Paulâr, a amin la musiche e ancje fâ scherçs, ma ur plâs la confusion: si platin dapardut, intai boscs, intes cjasis, e fintremai intal arbul di Maman! Sbilf Timp i à fat un scherç a Siôr Timp: viodût che al è in ritart, al à cjapât il so puest. La sere prime i à dât une biele sedon di mîl cu la lavande e cumò al è ancjemò daûr a durmî. Sbilf Timp si presente: “O soi un Sbilf e o vîf intai boscs de Cjargne, mi plâs mimetizâmi e stâ dongje des cjasis dai oms, dentri dai troncs dai arbui, mi vistìs di ros parcè che mi plâs chest colôr; jo e miei fradis o sin piçui, curiôs e berechins, nus plâs zuiâ, balâ, scoltâ musiche  e fâ dispiets: o sin cuasi simpri invisibii ma, se cualchidun al è fortunât, cualchi volte al pues viodinus, soredut i fruts bogns, al baste però no fâ confusion parcè che alore si rabiìn! E vuê Daria e Chiara a stan fasint tante di confusion…” Lis dôs amiis, intant che a balin, a sintin une vôs che e ven fûr dal arbul e, cjalant fûr dal barcon, cul canocjâl, a viodin Sbilf Timp. Lis dôs amiis a cjantin la cjançon “I Sbilfs” e sot sere Daria e conte a Vigji la sô zornade.

Condutoris e autoris: Daria Miani e Chiara Donada
Cu la partecipazion di: Manuel Buttus
Responsabil di produzion pe ARLeF: William Cisilino
Coordenament gjenerâl: Vittorio Vella (Deltastudios)
Regjie: Luca Fornasiero
Musichis origjinâls: Flaviano Miani (musiche), Daria Miani (peraulis)
Animazion sigle: Pierangelo Buttazzoni e Davide Nicolicchia
Consulence linguistiche e otimizazion: Linda Picco e Elena Zanussi (Calt sas)
Durade: 20 minûts cirche

Contats:
arlef@regione.fvg.it
maman@tvstar.com