Maman!© – 02-06 – FEVRÂR

Maman! La trasmission par fruts dute in lenghe furlane
In onde su Telefriuli (canâl 11) ogni vinars

Une produzion di ARLeF – Agjenzie Regjonâl pe Lenghe Furlane e di Telefriuli

Intune cjasute plene di colôrs a vivin Daria e il gjatut Vigji. Ogni dì e ven a cjatâju la lôr amie Chiara e ancje Siôr Timp, un personaç une vore stravagant: insiemi a passin dopodimisdîs une vore divertents là che a cjantin, a zuin, a contin barzaletis e a lein contis.

In cheste pontade: Fevrâr (6). Al è rivât Fevrâr, un mês tant berechin: Siôr Timp al conte che no si pues fidâsi, ni di lui e nancje dal so soreli, bisugne vistîsi ben! Ma ancje Siôr Timp, che al starnude, al somee che ancjemò nol vedi imparât che Fevrâr che al è il mês de fiere… Daria si è inmalade, e à la influence, cun sgrisui, mâl di cjâf, fiere alte e rafredôr; e clame Chiara al telefon e la amie e cor daurman li di jê cun ducj i “rimiedis de none”: une borse de aghe cjalde, une garze bagnade pal cerneli, i narançs pal struc, dôs cjastinis matis di tignî inte sachete, mîl, tisane pal mâl di cuel, brût di poleç par ricjapâ lis fuarcis. Dopo vê provât cualchi rimiedi, Daria però e scomence a çavariâ e alore Chiara e clame daurman il miedi. Daria e je vuaride e e cjante cun Chiara la cjançon “Il mês di Fevrâr”, dopo a lein il libri “Ma par fortune” di Sandra Fabris e Renata Gallo (Ed. Orto della Cultura). Daria, sot sere, i conte a Vigji la sô zornade e si vise che ancje lui al à cjapât il rafredôr: cumò e cor a clamâ il veterinari!

Condutoris e autoris: Daria Miani e Chiara Donada
Cu la partecipazion di: Manuel Buttus
Responsabil di produzion pe ARLeF: William Cisilino
Coordenament gjenerâl: Vittorio Vella (Deltastudios)
Regjie: Luca Fornasiero
Musichis origjinâls: Flaviano Miani (musiche), Daria Miani (peraulis)
Animazion sigle: Pierangelo Buttazzoni e Davide Nicolicchia
Consulence linguistiche e otimizazion: Linda Picco e Elena Zanussi (Calt sas)
Durade: 20 minûts cirche

Contats:
arlef@regione.fvg.it
maman@tvstar.com