Maman!© – 02-14 – I DÎS DE SETEMANE

Maman! La trasmission par fruts dute in lenghe furlane
In onde su Telefriuli (canâl 11) ogni vinars

Une produzion di ARLeF – Agjenzie Regjonâl pe Lenghe Furlane e di Telefriuli

Intune cjasute plene di colôrs a vivin Daria e il gjatut Vigji. Ogni dì e ven a cjatâju la lôr amie Chiara e ancje Siôr Timp, un personaç une vore stravagant: insiemi a passin dopodimisdîs une vore divertents là che a cjantin, a zuin, a contin barzaletis e a lein contis.

In cheste pontade: I dîs de setemane (14). Siôr Timp al à simpri pôc timp ancje par viodi i siei amîs e al à tantis robis di fâ. Al ripet la sô formule magjiche e al propon il so enigme di risolvi. Chiara e Daria a son impegnadis une vore dute la setemane: il lunis si cjatin par strade cuant che Chiara e va a un cors di francês e Daria di flaut traviers; il martars Chiara e va a zuiâ a bale tal zei e Daria a nadâ; il miercus par Chiara e je la ghitare e par Daria la biblioteche; la joibe di matine Chiara e nete cjase intant che Daria e fâs la spese, ma dopomisdì Chiara e fâs la spese e Daria e nete. Vinars, infin, dopo vê corût dute la setemane, si cjatin a cjase par zuiâ e a pensin a trop che al è biel il fin di setemane cuant che si pues durmî dute la buinore. Chiara e conte che, par no rivâ tart e par no dismenteâsi i siei tancj impegns, e à fat un calendari cui simbui des sôs ativitâts. Braurosis di cheste idee, Daria e Chiara si metin a cjantâ “I dîs di setemane” e dopo a lein “Doi nonos scompagnâts” di Francesca Gregoricchio (ed. Kappa Vu).

Condutoris e autoris: Daria Miani e Chiara Donada
Cu la partecipazion di: Manuel Buttus
Responsabil di produzion pe ARLeF: William Cisilino
Coordenament gjenerâl: Vittorio Vella (Deltastudios)
Regjie: Luca Fornasiero
Musichis origjinâls: Flaviano Miani (musiche), Daria Miani (peraulis)
Animazion sigle: Pierangelo Buttazzoni e Davide Nicolicchia
Consulence linguistiche e otimizazion: Linda Picco e Elena Zanussi (Calt sas)
Durade: 20 minûts cirche

Contats:
arlef@regione.fvg.it
maman@tvstar.com