Maman!© – 04-01 – SANGLOÇ

Maman! La trasmission par fruts dute in lenghe furlane
In onde su Telefriuli (canâl 11) ogni vinars

Une produzion di ARLeF – Agjenzie Regjonâl pe Lenghe Furlane e di Telefriuli

Intune cjasute plene di colôrs a vivin Daria e il gjatut Vigji. Ogni dì e ven a cjatâju la lôr amie Chiara e ancje doi personaçs simpatics, il crot inglês Free e la moscje furlane Ulli: insiemi a passin dopodimisdîs une vore divertents là che a cjantin, a zuin, a contin barzaletis e a lein contis.

In cheste pontade: Sangloç (1). A son finidis lis feriis estivis, la scuele e je tornade a scomençâ e Daria e Chiara a son tornadis! A fasin mirinde prime di lâ fûr a zuiâ ma Chiara e à cussì premure di jessî che e mangje tant svelte di fâsi vignî il sangloç. Daria e cognòs diviersis manieris par gjavâ il sangloç e lis sperimente dutis cun Chiara: e cîr di spaurîle, le fâs saltâ cuntune gjambe sole, le fâs sentâ e pleâ lis gjambis par pressâ il diaframe, i fâs mangjâ une fete di limon, une sedonute di mîl e soflâ dentri di un sacut. Ae fin, dome cjantant la filastrocje dal sangloç, chest al ferme. Chiara e je scanade dopo vê provât ducj i metodis de tradizion e, intant che e propon di lâ fûr a zuiâ… il sangloç i tache ancje a Daria. Dopo vê fat un zûc e i induvinei, vê scoltade la leture di “Il Piçul princip” (Antoine di Saint-Exupéry, ed. Nota, 2018), Daria si rilasse tal tinel cul so gjatut Vigji contantji lis aventuris de zornade.

Condutoris e autoris: Daria Miani e Chiara Donada
Cu la partecipazion di: Silvia Piani e Silvia Gazzetta (Free & Ulli)
Responsabil di produzion pe ARLeF: William Cisilino
Coordenament gjenerâl: Vittorio Vella (Deltastudios)
Regjie e animazion sigle: Tommaso Ravo
Musichis origjinâls: Flaviano Miani (musiche), Daria Miani (peraulis)
Consulence linguistiche e otimizazion: Michele Calligaris e Linda Picco – Sportel regjonâl pe lenghe furlane/Calt
Durade: 20 minûts cirche

Contats:
arlef@regione.fvg.it
maman@tvstar.com