William Cisilino, diretôr de Agjenzie regjonâl pe lenghe furlane, e Flavio Santi, scritôr e docent te Universitât de Insubria, a àn acetade la sfide di contâ plui di mil agns di storie in 60 minûts.
“L’avventurosa storia della lingua friulana e della sua letteratura” e sarà contade tal event par cure de ARLeF pe edizion 2024 dal festival Vicino/lontano che si fasarà sabide ai 11 di Mai, aes 17.30, a Udin li de Tor di Sante Marie, in vie Zanon, 24.
Parcè il furlan isal une lenghe? Cemût isal nassût e cemût si isal svilupât? Cui sono lis sôs scritoris e i siei scritôrs? Cuâi sono i popui che a àn metût adun la lenghe ladine plui orientâl? Cui sono lis feminis e i oms che, za de Ete di Mieç, a àn sielzût di rivendicâ l’ûs de marilenghe par fâ art?
A son chestis lis domandis che a varan rispueste intun dialic, siôr di curiositâts e di ironie, che al piturarà un ritrat inedit de lenghe furlane, sintesi des culturis che tai secui a àn traviersât il Friûl.
Jentrade libare.
