Aromai e je deventade une tradizion: pal tierç an di file al è stât publicât il “Calendari Storic de Arme dai Carabinîrs”, la version in lenghe furlane dal “Calendario Storico dell’Arma dei Carabinieri”, opare une vore preseade e rivade ae edizion numar 92. Al è un progjet editoriâl che si presente ogni an cun contignûts gnûfs e pardabon impuartants: pal 2025 al indrece il so messaç ai zovins.
La iniziative e je nassude de colaborazion tra il Comant de Legjon Carabinîrs “Friûl-Vignesie Julie”, la Regjon Autonome Friûl-Vignesie Julie e la Agjenzie regjonâl pe lenghe furlane che e à curât ancje la traduzion. La opare e je stade voltade par furlan e ancje par inglês, francês, castilian, todesc, portughês, gjaponês, cinês, arap e sart, par un totâl di 10 lenghis.
“I Carabinîrs e i zovins” al è il teme dal Calendari 2025, realizât cul contribût di nons innomenâts dal panorame artistic e leterari talian. Marco Lodola al à curât la part grafiche. L’artist poliedric dal Gnûf Futurisim e de Pop Art taliane al rafigure carabinîrs e sogjets zovins creant une version su cjarte di chês “sculturis luminosis” che lu àn fat deventâ famôs par dut il mont, marcant cul so stîl il fat che i carabinîrs a rivin a jessi modernis te tradizion.
Maurizio De Giovanni, invezit, scritôr, dramaturc e autôr televisîf napoletan, al à scrit i tescj: a descrivin un dialic che si disvilupe par letare fra un maressial comandant di Stazion, vedul, e so fi, student impegnât a frontâ lis sfidis di ogni dì ma ancje il dolôr, condividût cun so pari, pe muart de mari. Par rivâ a dialogâ, il maressial i conte dal so lavôr, fevelant di episodis di cuant che al è in servizi che a tocjin temis tant che la prevaricazion sui plui debii, lis dipendencis, la difese dal ambient e dal rispiet par chei altris, la inclusion e la solitudin sociâl.
Il risultât a son 12 taulis, une par ogni letare scrite, che a valorizin i zovins, invistiment preziôs pal avignî dal Paîs, ricuardant une des ativitâts preventivis principâls che la Arme e puarte indenant par lôr, i incuintris tes scuelis su la “Culture de legalitât”, che a àn tant che obietîf chel di promovi la cognossince de leç e de culture civiche.
Fin dal principi, il Calendari al è stât une opare cirude e preseade di tancj. La sô publicazion, tacade tal 1928 e rivade ae edizion numar 92, si è fermade dome dopo de seconde vuere mondiâl, dal 1945 al 1949. Dal 1950 e je tornade a partî cun regolaritât e di chê volte e je stade une interprete puntuâl dai avigniments de Arme e, midiant di cheste, de Storie dal Paîs.
