La mostre, fra i events colaterâi des celebrazions de Fieste de Patrie dal Friûl, e analize il rapuart fra art e teritori, cu lis oparis di 8 artiscj.
Al è un viaç te art furlane dai ultins cuarante agns “Stralûs. 1985-2025 Arte in Friuli / Art in Friûl”: la mostre ospitade a Palaç Ragazzoni, a Sacîl, e je il risultât de colaborazion tra la Regjon Friûl-Vignesie Julie, la Universitât dal Friûl, il Comun di Sacîl e la ARLeF. E je realizade in ocasion de Fieste de Patrie dal Friûl dal 2025, cul contribût de L.R. 6/2015.
E je une iniziative espositive e editoriâl, gnove tai contignûts e te forme. Il progjet al smire a leâ dôs tematichis che dome in aparence a son lontanis fra di lôr, ven a stâi la art contemporanie e la lenghe e la identitât furlanis, mostrant che la culture moderne dal Friûl e je buine di dialogâ cul mont e di contribuî a un mosaic identitari cu la sô autenticitât.
Curade di Magalì Cappellaro e Alberto Vidissoni de Universitât dal Friûl, la coletive e analize il rapuart tra art e teritori, cuntune atenzion particolâr sui mudaments, lis riflessions e lis sperimentazions che a àn caraterizât la sene artistiche dai ultins cuarante agns. Une panoramiche su la ricjece e la diversitât de art furlane, contade des oparis di Bruno Aita, Mattia Montanari, Stefano Tubaro, Giorgio Valvassori, Nata, Ludovico Bomben, Walter Bortolossi e Claudio Mario Feruglio: vot artiscj che a son i testemonis di vot lengaçs espressîfs e i esponents di dôs gjenerazions.
Une ocasion uniche par tornâ a scuvierzi e par celebrâ la art de nestre tiere, instreçant il passât e il presint intune conte visive siore di emozions, memorie e inovazion.
“Stralûs. 1985-2025 Arte in Friuli / Art in Friûl” si struture in trê sezions. Si tache di chê che i curadôrs a àn interpretât come “la origjin”, o “l’at iniziâl di un percors assendent”: si confrontin i lavôrs di Nata (Codroip, 1955) e Bruno Aita (Udin, 1954), cun tonalitâts di tiere e scuris, intun rapuart continui tra la materie e la azion dal piturâ. Lant indenant, tal prin plan di Palaç Ragazzoni, i visitadôrs a cjataran lis oparis di Stefano Tubaro (Codroip, 1960), Walter Bortolossi (Basilee, 1961) e Giorgio Valvassori (Gurize, 1947). Ducj i trê a puartin il spetatôr intun mont fat di inciertece, fra oparis che a mudin cul mudâ dal pont di viste dal osservadôr. Te tierce e ultime sezion, invezit, si vierç un percors di scomposizion de figure, cui lavôrs di Mattia Montanari (San Denêl, 1991), Claudio Mario Feruglio (Udin,
1953) e Ludovico Bomben (Pordenon, 1982).
🕒La mostre e restarà vierte fin domenie ai 11 di Mai (fûr che tai dîs di fieste dai 20 e dai 25 di Avrîl e il 1n di Mai):
– il vinars, des 15 aes 19
– e la sabide e la domenie, des 10 aes 13 e des 15 aes 19.
