Storie, identitât e tradizions civichis
Il Fogolâr Civic di Udin, vuidât dal prof. Alberto Travain, al promôf a Udin e in Friûl une ativitât culturâl e civiche dedicade ae cognossince de storie locâl, ae valorizazion de lenghe e de culture furlane, recuperant ricorencis civichis antighis, tradizions e zûcs midiant di iniziativis pai citadins, pes scuelis e pes associazions.
Si trate di une ativitât che e à vût il patrocini e la colaborazion de ARLeF, pe sô impuartance tal puartâ indevant la lenghe e la identitât furlanis.
Il “Complean” de Citât di Udin
Une des iniziativis principâls e je la celebrazion dai 13 di Setembar, date che e ricuarde la istituzion dal marcjât di Udin di bande dal patriarcje di Aquilee Bertolt di Andechs, tal 1223.
Il marcjât, nassût tra il Cjistiel e la Vile di Udin, al rapresentà un moment decisîf tal disvilup de citât, che tai secui dopo e sarès deventade la capitâl de Patrie dal Friûl.
Dal 2001, il Fogolâr Civic, cul Circul Universitari Furlan “Academie dal Friûl”, al celebre chest inovâl come “Complean de Citât”, proponintlu tant che moment di memorie e di civisim, riclamant il rûl storic di Udin tant che citât di incuintri tra culturis latinis, gjermanichis e slavis.
La riscuvierte dai Palis antîcs
Un altri filon impuartant di ativitât al è peât ae riscuvierte e ae valorizazion dai antîcs Palis citadins, tornâts a interpretâ in formis contemporaniis.
Il “Pali di Avrîl” o “di S. Zorç” al è peât al antîc Pali di Sant Zorç, documentât a Udin za tal 1334. La rievocazion ludiche e agonistiche si davuelç come un zûc di strade dilunc di vie Marcjât Vieri. I contendents a son rapresentâts di pipins di len a forme di cjaval che a van indenant intun percors che al previôt ancje domandis e provis dedicadis ae storie di Udin, al patrimoni locâl e ae lenghe furlane.
Il “Pali di Jugn”, cognossût ancje come “Pali des Rosis” o “Pali dal Beât Beltram”, al jentre tal program di celebrazions par memoreâ Beltram di Saint Geniès, patriarcje di Aquilee sassinât ai 6 di Jugn dal 1350 e Patron Civîl di Udin, martar e pacificadôr celest des lotis intestinis. Une sorte di olimpiade udinese e furlane, ancje chest pali si davuelç in vie Marcjât Vieri, tornant a interpretâ antighis competizions citadinis che a vevin come protagoniscj arcîrs, balestrîrs e cavalîrs.
Il “Pali di Avost” cognossût ancje come “Pali de Fontane” o “Pali de Madone di Avost” si cor dilunc dal anel de Fontane dal Ricamadôr, in place Sant Jacum, ricuardant la corse tor ator dal “Zardin Grant” o Place Prin di Mai che si faseve tal Sietcent.
La manifestazion e cumbine storie, modelisim e zûc. I protagoniscj di fat a son pipins in scjale 1:72, posizionâts dilunc di un percors struturât sul model dal zûc de ocje tradizionâl.
Un altri disvilup dal zûc nomenât parsore e je la cussì clamade “Gran Cuintane Udinexe“, maratone alegoriche che e met insiemi dodis garis antighis o “fadiis” de tradizion locâl e che si cor in ocasion dal “Complean de Citât”.
Consulte i materiâi
| Ogjet | Cjale |
| Pali di Avrîl |
|
| Pali di Jugn |
|
| Pali di Avost |
|
| Complean de citât di Udin |
|
| Lidrîs d'Artuì |
|
