A restin ancjemò pôcs dîs par podê cjalâ in maniere gratuite, su RaiPlay, “Marcho. L’ultima bandiera”, lât in onde in prime assolude su Rai Storia, ai 31 di Otubar stâts te trasmission “5000 anni e più. La lunga storia dell’umanità”. Par viodilu, si à di jentrâ te liste dai programs e sielzi il titul de trasmission.
Come che al à marcât il condutôr dal program, Giorgio Zanchini, e je une ocasion straordenarie par scuvierzi aspiets pôc cognossûts e une vore inmagants de storie dal Friûl, che si incrose cun events impuartants de storie europeane.
Il docufilm, une coproduzion ARLeF e Arte Video, cu la regjie di Marco Fabbro, al conte la storie di Marc di Murùs, l’ultin Puartebandiere dal Stât patriarcjâl di Aquilee. Unic nobil che i à fat cuintri ae invasion di Vignesie, tor il 1420. Un event restât segret par 500 agns e discuviert dome tal 1986, intant che si fasevin lavôrs di restaur, cuntune letare sbrissade fûr des pagjinis di un libri conservât te residence fortificade La Brunelde di Feagne.
La opare, realizade cul contribût de Friuli Venezia Giulia Film Commission e dal Fonts pal audiovisîf dal Friûl-Vignesie Julie, e je notevule pe precision vude te ricercje filologjiche di ogni detai: il prodot che al rive al public al è di grande cualitât, ancje in graciis dai aprofondiments de bande di storics e di esperts de storie dal Friûl (Franco Cardini, Alberto Travain, Flavia Maria De Vitt, William Cisilino, Gianfranco Ellero).
Di grande cualitât ancje il nivel dai atôrs: dal straordenari Paolo Mutti, che al interprete Marc, a Aida Talliente, che e je Catarine Arcoloniane, la sô femine; Fabiano Fantini al impersone Pileo, pari di Marc; Alessandro Mistichelli al fâs la part di Riçart di Darcjan, Lorenzo Acquaviva al è il Dôs Tommaso Mocenigo e Paolo Fagiolo il Cjapitani venezian.
Il film al è stât zirât in vot ambientazions diferentis dal Friûle pe sô realizazion a son stadis cjapadis dentri plui di dusinte personis.
