Ancje chest an, in ocasion de edizion numar 28 de Fieste dal Miluç di Tumieç, al torne l’apontament tradizionâl cun Maman!.
Inte suaze de manifestazion al è in program un dopomisdì dedicât ai plui piçui cun “1, 2, 3, 4, 5… Numaruts cun Maman!”. Il laboratori ludic didatic, proponût de ARLeF – Agjenzie regjonâl pe lenghe furlane, si fasarà sabide ai 21 di Setembar, aes 15.30, tal tendon in place XX di Setembar.
Adun cu la lôr beniamine Daria Miani, la condutore de trasmission TV Maman!, i fruts a podaran passâse cui simpatics modonuts, une vore colorâts, protagoniscj dal carton animât “I Numaruts”. Il carton al è la version furlane di “Numberblocks”, la innomenade serie de BBC che e jude i plui piçui a imparâ a fâ di cont. A saran proietadis ancje pontadis dal carton trasmetudis intant di Maman!, il program par fruts dut par furlan (su Telefriuli, ogni vinars aes 18.30, in repliche la domenie aes 7 e aes 13, e su la TV on demand) e che si puedin cjatâ ancje tal sît arlef.it e tal canâl YouTube de ARLeF.
“1, 2, 3, 4, 5… Numaruts cun Maman!” al sarà une biele maniere par divertîsi cu la lenghe furlane, in spiete de gnove stagjon de trasmission, che e tacarà vinars ai 11 di Otubar su Telefriuli. Tra lis novitâts, la presince di une simpatiche “vicine di cjase” de condutore Daria, Desiree Chiappo Debegnach. Fra lis confermis, invezit, no podeve mancjâ la rubriche “Zuìn cu lis lenghis”, tant preseade dai fruts, che ju jude a zuiâ cu la lenghe furlane e cun chê inglese.
Il program al propon esperiencis ludichis e educativis adatis ai fruts de scuele de infanzie e primarie e al è propit chel stes format, fat di zûcs e di didatiche, che al sarà protagonist a Tumieç. Prin di saludâsi, a ducj i partecipants ur vignarà dât un regâl simpatic, un ricuart dal dopomisdì passât a divertîsi cu la lenghe furlane.
