Cundizion sociolinguistiche

I studis di caratar sociolinguistic a rapresentin un bon strument di misurazion e di valutazion de cundizion di une lenghe intune societât.

Cun di plui, come che al sucêt pal furlan, a puedin furnî informazions impuartantis a chei che a viodin di politiche e di planificazion linguistiche, e ufrî sugjeriments che a permetin di tarâ miôr che si pues i intervents sul teritori tutelât. Dal 1977 a vuê, in Friûl a son stâts puartâts indevant diviers studis su la cundizion sociolinguistiche de lenghe furlane, cul fin di cjatâ il numar di chei che le fevelin, i contescj dulà che si dopre cheste lenghe, lis opinions e i compuartaments dai furlanofons leâts ae marilenghe.
O vin duncje un cuadri avonde precîs des dinamichis linguistichis dal furlan, che in part si darà cont in chest lavôr.

Lis primis ricercjis in chest cjamp a nivel regjonâl o provinciâl a son stadis curadis dal Istitût di Sociologjie Internazionâl di Gurize (ISIG), tal 1977 e tal 1986. Invezit, tal 1998, e tacà une indagjin curade dal Dipartiment di Economie, Societât e Teritori de Universitât dal Friûl, cul obietîf di rilevâ lis tindincis evolutivis e lis dinamichis sociolinguistichis de lenghe furlane tai vincj agns dopo de prime ricercje.

Un altri studi al è stât sierât tal 2003 li dal Centri Interdipartimentâl di Ricercje su la culture e la lenghe dal Friûl (CIRF) de Universitât dal Friûl: in chest câs, si à volût lâ indevant cuntun gnûf filon di studis, indreçât a rilevâ la frecuence e i cjamps di ûs dal furlan, lis opinions, i compuartaments e lis cognossincis di grups specifics par etât o par altris carateristichis anagrafichis, sociâls e culturâls. Tal specific, chest studi sociolinguistic al à rivuardât un campion di adolessents che a son a stâ in Friûl, di etât cjapade tra i 15 e i 18 agns.

Tal 2015 la ARLeF cu la colaborazion de Universitât dal Friûl, sot dal coordenament dal responsabil sientific Claudio Melchior, e à presentât i dâts complets de ricercje sociolinguistiche su la lenghe furlane realizade tal 2014.

---

STUDIS PLUI RESINTS

Tal 2023, e je stade fate la ricercje sociolinguistiche “Tire fûr la lenghe”, sostignude de Regjon FVJ cul contribût de ARLeF e realizade dal IRES FVG e dal FEF (Forskningscentrum för Europeisk Flerspråkighet) te suaze dal Plan Gjenerâl di Politiche Linguistiche pe lenghe furlane 2021-2025. A son stadis cjapadis sù plui di 4.300 intervistis in 178 Comuns, dant fûr un cuistionari di compilâ.

I prins risultâts plui significatîfs – presentâts tal Mai dal 2024 – a pandin che la lenghe furlane vuê e je fevelade in maniere ative di 444.000 personis (che a corispuindin a plui de metât de popolazion che e je a stâ tai Comuns di lenghe furlane de Regjon autonome Friûl-VJ e de Regjon Venit), che a rivin a cirche 700.000 (o ben 9 personis su 10), se si considere ancje chei che dome le capissin. Lis areis dulà che si dopre il furlan in maniere ative in percentuâl plui alte a son il Friûl centrâl, la zone dal Culinâr e la Cjargne. In sostance, in buine part des zonis indagadis, almancul une persone su 2 e fevele par furlan e une su 4 e podarès tornâ a ativâ la sô competence te lenghe furlane se e ven stiçade a doprâlu.

Il sens di apartignince e la identitât furlane si afermin in maniere decise te plui part des areis cjapadis dentri: il 52% dal campion al dîs di sintîsi “une vore” furlan, percentuâl che e va sù al 75% se si considere ancje cui che al declare di jessilu “avonde”.

Cumò i ricercjadôrs a son impegnâts tal analizâ in maniere complessive il grant numar di dâts cjapâts sù, cul obietîf di publicâju ducj dentri la fin dal 2024.

---

La lenghe furlane si fevele in 173 Comuns de Regjon F-VJ (122 de ex provincie di Udin, 15 de ex provincie di Gurize e 36 de ex provincie di Pordenon) e in 7 Comuns de Regjon dal Venit (Cint, Concuardie, Fossalte, Gruâr, Puart, San Michêl dal Tiliment, Tei): 3 di chescj a son ricognossûts de leç 482/99.
Achì al è pussibil viodi la liste complete dai comuns furlanofons.

---