La gnove coproduzion de ARLeF – Agjenzie regjonâl pe lenghe furlane e di Mittelfest2024, realizade in colaborazion cul Teatri Stabil Furlan, e larà in sene, in prime assolude, domenie ai 21 di Lui aes 21.30, sul grant palc a cîl viert di place dal Domo, a Cividât (in câs di brut timp, il spetacul si fasarà te glesie di Sant Francesc).
Passant des peraulis des poesiis di Pierluigi Cappello a chês dal unic romanç che al à scrit, “Questa libertà”, l’atôr Giuseppe Battiston e il musicist Piero Sidoti a saran sul palc di Mittelfest par un tribût al poete, metint adun la musiche origjinâl, componude e sunade dal vîf di Sidoti, cu la peraule furlane e taliane, recitade di Battiston.
Cappello interpretât dal so cjâr amì Battiston: dôs sensibilitâts, dôs espressivitâts che si cjatin e si completin intun spetacul unic, deventât realtât in graciis dal protocol di intese tra la ARLeF e Mittelfest, che al è stât rinovât. Cheste vision comune e à permetût di insaldâ un rapuart di colaborazion, aromai decenâl, za une vore produtîf e che al à puartât a disvilupâ tantis coproduzions une vore preseadis dal public.
Il spetacul, cun Battiston e la regjiste Paola Rota a curâ la dramaturgjie, al puartarà in sene par talian e par furlan (cun soretitui par talian) cualchi test di Cappello, par pandi la complessitât e la potence de sô peraule, che intes sôs oparis al è un concet che al tocje tancj nivei e tancj aspiets. Une peraule cuarp, fate di sun e di cidinôr che e vignarà fûr cu la abilitât e la vôs di Giuseppe Battiston e cu la musiche di Piero Sidoti: artiscj furlans che a rivin a trasmeti la profonditât de peraule di Cappello.
La opare di Cappello e met dongje la sonoritât de poesie e la capacitât di contâ il metafisic, tacant de dimension minime e concrete des robiis, ancje di chês plui sutis e duris. In cheste maniere, i paisaçs de infanzie a Scluse, i agns di sfolament dal taramot, ma ancje lis lungjis costrizions leadis ae malatie, si misclicin e a sclopin fûr, creant tancj imagjinaris, dificii di spietâsi, e la pussibilitât di viazâ cu la scriture, in mût materiâl, di là dal caos.
Par informazions sui biliets:
Bilietarie di Mittelfest: 0432 734316 o biglietteriamittelfest@gmail.com
