La ARLeF – Agjenzie Regjonâl pe Lenghe Furlane, e à premiât il lavôr di Sergio Venuti che di passe 35 agns al à un rûl impuartant inte promozion de lenghe furlane, cul ûs dai media e la organizazion des messis in furlan. Di fat al è un tra i fondadôrs storics di Radio Onde Furlane, che propit chest an e fâs fieste pai siei prins 40 agns, e al organize lis messis in marilenghe tal Oratori de Puritât a Udin.
«O vin volût ricognossi cuntune piçule azion – al à dite il President de ARLeF, Eros Cisilino – il lavôr che Sergio Venuti al à fat cun altruisim in chescj 40 agns. Une persone umile ma che e à savût dâ fuarce a dôs ideis fondamentâls pe nestre lenghe.»
«O dîs graciis ae ARLeF par chest ricognossiment – al à comentât Venuti – che, plui che a mi, al va a ducj chei che a colaborin ogni sabide par che la messe in marilenghe e sedi celebrade. Ogni messe e je insiorade di une corâl diferente; si son bielzà esibidis une cincuantine di corâls che a rivin di dut il Friûl storic. La grande partecipazion di fedêi ogni setemane e mostre in maniere concrete l’interès par cheste celebrazion che, dongje dal ûs de marilenghe te preiere, e fâs cognossi i cjants liturgjics antîcs di Aquilee, che a son une part impuartante de nestre culture.»
Ae premiazion a jerin ancje il diretôr de ARLeF William Cisilino e pre Romano Michelotti, vicepresident di Glesie Furlane.
