“No stâ a fâti contâ la storie dal ors: ven su YoupalTubo!”
Al è chest il sproc che la ARLeF e à sielzût pe gnove campagne di promozion, dulà che la simpatie e la ironie a deventin il mieç par fâ discuvierzi il furlan aes gnovis gjenerazions midiant dal digjitâl.
La ARLeF si indrece ancjemò une volte ai zovins. La Agjenzie e lavore za di timp a infuartî chest leam, ancje daûr dal Plan gjenerâl di politiche linguistiche fat bon de Regjon. Lis Gjenerazions Z e Alpha a son di fat un “public” impuartant che al domande atenzion e progjets di comunicazion digjitâl. Ve che alore i testemonis plui adats a son propit i youtubers furlans, che a presentin cun sucès contignûts creatîfs bogns di cjapâ dentri i zovins, ma no dome.
La strategjie comunicative e tache propit dai social network che a son il mieç di comunicazion plui doprât dai zovins: di TikTok a Facebook, tocjant Instagram e YouTube, cence dismenteâsi di WhatsApp. E propit tai social si fevelarà sigûr dal video di Mattia Cantarutti e Federico Iob (“Chei di Udin”): “Parlare friulano a Trieste”. Lant daûr di un format di YoupalTubo che al à tant sucès, “Chei di Udin” a àn domandât ai triestins, e tra chei ancje al innomenât “coleghe” Max Sganga, di misurâsi cu la lenghe furlane. Il risultât al è un “Quiz Mortâl” une vore sureâl e divertent, cun tantis ridadis.
Par television, al è previodût un spot di 30 seconts, un concentrât di tocuts di videos di YoupalTubo che al pant une vore ben la ricjece di contignûts dal canâl. Ancje il spot radiofonic al invide il public a stâi daûr al canâl.
Su la stampe, infin, il protagonist al è un ors fûr dal ordenari: scufis stereo tes orelis e vistîts in stîl trap. Al clame la atenzion dai letôrs, rimandant ae detule furlane No stâ a fâti contâ la storie dal ors: ven su YoupalTubo!. La campagne e je completade di un depliant che al marche i aspiets plui impuartants dal canâl.
Consulte i materiâi
| Ogjet | Cjale |
| Cjale dute la campagne 2024 de ARLeF |
|
