Fieste grande e tant public intun dai lûcs simbolics de identitât furlane
Un cîl celest, come la bandiere dal Friûl, e un soreli aur, come la sô acuile, a àn compagnât une edizion plene di int de Fieste de Patrie dal Friûl, la numar 47, ospitade a Tarcint domenie ai 7 di Avrîl dal 2024.
L’event – inmaneât dal Comun di Tarcint, de Regjon Autonome Friûl-Vignesie Julie e de Agjenzie regjonâl pe lenghe furlane – ARLeF, in colaborazion cul Istitût Ladin Furlan “Pre Checo Placerean” – al è stât screât cu lis autoritâts che a àn puartât un omaç floreâl al monument in memorie di Chino Ermacora, sul cuel di Sante Eufemie a Segnà.
Rivadis po in place Libertât, a àn assistût ae esposizion de bandiere dal Friûl, compagnade de Bande musicâl dai ex alpins di Cuie che e à sunât “Incuintri al doman”, l’Imni dal Friûl. Dopo di chest, il corteu al è lât bande il Domo, là che e je stade dite messe par furlan, compagnade dal Côr “San Pietro Apostolo”, cun leturis e preieris ancje in lenghe slovene e todescje. Finide la funzion, si à esibît il Grup folcloristic “Chino Ermacora”.
Dopo vê dât acet ae delegazion dai cicloturiscj de FIAB regjonâl, i presints si
son spostâts inte sale Margherita pes celebrazions civîi, cul Imni dal Friûl, la leture de Bole imperiâl e il tradizionâl scambi de bandiere tra il Comun di Caprive e il Comun di Tarcint.
Po dopo, al è stât proietât il gnûf video dal canâl YouTube in lenghe furlane, YouPalTubo, La bandiere furlane tal spazi, là che si conte la storie incredibile dal astronaute di divignince furlane, Gregory Thomas Linteris, che al veve puartade daûr la bandiere dal Friûl tal spazi. Pe ocasion e jere presinte ancje Desiree Chiappo Debegnach, la youtuber che e à contât cheste storie, e il protagonist de aventure “spaziâl”, midiant di un
videomessaç. Par sierâ la buinore, la esibizion de sopran Maria Giovanna Michelini, compagnade de arpe di Serena Vizzutti.
A Tarcint e jere presinte une delegazion numerose di sindics e di rapresentants dal teritori di lenghe furlane, che a àn vût il bon acet dal paron di cjase, il sindic di Tarcint Mauro Steccati. Vie pe cerimonie civîl, insiemi a lui a àn puartât il lôr salût Geremia Gomboso, president dal Istitût Ladin Furlan, Walter Bandelj, president de SSO Svet slovenskih
organizacij e Raimondo Domenig, vice president dal KKV Kanaltaler Kulturverein (chestis dôs ultimis presincis a confermin, ancjemò une volte, che la Fieste e je un moment impuartant par celebrâ il valôr e la ricjece dal plurilinguisim de nestre regjon); Claudio Violino, vice president de ACLiF – Assemblee de Comunitât linguistiche furlane; Dorino Favot, president de ANCI FVG – Associazion nazionâl comuns talians; Federico Vicario,
rapresentant de Universitât dal Friûl e president deSocietât Filologjiche Furlane; Eros Cisilino, president de ARLeF – Agjenzie regjonâl pe lenghe furlane; l’on. Emanuele Loperfido; (in videomessaç) Pierpaolo Roberti, assessôr regjonâl aes autonomiis locâls; Barbara Zilli, assessore regjonâl aes financis. A jerin presints ancje il sindic di Udin, Alberto Felice De Toni cu la conseire delegade, Stefania Garlatti-Costa; Maurizio Negro, assessôr dal Comun di Gurize; Paola De Giorgi, conseire delegade dal Comun di Pordenon.
Dopo dal gustâ, il program de Fieste al è lât indenant tal dopodimisdì, dant aes personis rivadis a Tarcint la pussibilitât di gjoldi dai itineraris culturâi di Palaç Frangipane.
Date de Iniziative: Avrîl 2024
