A son finidis, tal Comun plui di soreli a mont dal Friûl, Sacîl, lis celebrazions de edizion numar 48 de Fieste de Patrie dal Friûl che a àn ricuardât i 948 agns de costituzion dal Stât patriarcjâl furlan, fondât ai 3 di Avrîl dal 1077. La citât puarte dal Friûl e rapresente une sielte pardabon simboliche par vie che, tal 1366, il patriarcje Marquart di Randeck al à volût promulgâ propit li lis Constitutiones Patriae Fori Iulii.
L’event di chest an al è stât inmaneât dal Comun di Sacîl, de Regjon Autonome FriûlVignesie Julie e de Agjenzie regjonâl pe lenghe furlane – ARLeF, in colaborazion cul Istitût Ladin Furlan “Pre Checo Placerean”.
La Fieste de Patrie dal Friûl e je tacade in place Sant’Odorico, cul tradizionâl alcebandiere de Bandiere dal Friûl. A jerin presintis, come simpri, tantis autoritâts, adun cui sindics e i rapresentants dai comuns dal Friûl.
Dopo, te Glesie di Sant Uldarì, e je stade celebrade la Messe, cun leturis e preieris par furlan, sloven, todesc e venit.
Finide la funzion, lis cerimoniis a son ladis indenant te Loze dal Municipi, dulà che al è stât dât il salût di benvignût ai ospits e a ducj i citadins. Lis celebrazions civîls a son po continuadis tal Teatri Ruffo, cu la esecuzion dal Imni dal Friûl intonât de talentuose mieç sopran Valentina Volpe Andreazza, acompagnade dal piano di Ruggero Spagnol, assessôr ae culture de Citât di Sacîl. Finide la esibizion, si è lete la Bole imperiâl e si è fat il tradizionâl scambi de bandiere tra il sindic di Tarcint, Maurizio Steccati, che al veve dât acet ae Fieste l’an passât, e il sindic di Sacîl, Carlo Spagnol.
Dopo, al è stât il moment dai intervents des tantis autoritâts presintis.
Dilunc de cerimonie civîl, dopo dal sindic, a son intervignûts: Geremia Gomboso, president dal Istitût Ladin Furlan; Daniele Sergon, president de ACLiF – Assemblee de comunitât linguistiche furlane; Dorino Favot, president de ANCI FVG – Associazion Nazionâl dai Comuns talians; Angelo Montanari, che cul mês di Otubar cu ven al sarà il retôr de Universitât dal Friûl; Eros Cisilino, president de ARLeF – Agjenzie regjonâl pe lenghe
furlane; i onorevui Isabella De Monte e Emanuele Loperfido; la senatore Tatjana Rojc; Markus Maurmair pal Consei Regjonâl dal F-VJ; Mario Anzil, vicepresident de Regjon Autonome Friûl-Vignesie Julie e assessôr regjonâl ae culture; il president de Regjon Massimiliano Fedriga (cuntun messaç video). A jerin presints ancje Rita Nassimbeni, presidente dal Consei comunâl di Udin e la conseire Stefania Garlatti Costa; Maurizio Negro, assessôr dal Comun di Gurize; Stefania Miotto pe Societât Filologjiche Furlane.
Il program de Fieste al è lât indenant tal dopomisdì, dopo dal gustâ tradizionâl, dant ai presints la pussibilitât di partecipâ ai tancj itineraris culturâi. Fra chescj, la mostre di art “Stralûs. 1985-2025 Arte in Friuli / Art in Friûl“, tal Palaç Ragazzoni, risultât impuartant de colaborazion fra la Regjon Autonome Friûl-Vignesie Julie, la Universitât dal Friûl, il Comun di Sacîl e la ARLeF.
Date de Iniziative: Avrîl 2025
