Ai 13 di Setembar al cole un aniversari une vore speciâl pe citât di Udin, che di 802 agns e vîf “une maniere di sei furlans dute particolâr“.
Ai 13 di Setembar 2001, il moviment culturâl civic-universitari Academie dal Friûl – Fogolâr Civic, cu la vuide dal prof. Alberto Travain, in chel inovâl, a Udin, al screà lis celebrazions di iniziative libare di popul pal “Complean de Citât” e chês si rinovarin, dopo, an par an, deventant costum e pont di braùre di une citadinance.
La ARLeF si zonte tes celebrazions di chest inovâl tal ricuardâlu tant che che un moment di fonde pe identitât di un popul intîr e ancje di un spazi di civiltât su la crosere de Europe.
Jenfri Cjistiel e Vile di Udin, jenfri fossalat e muris cjastelanis, ai 13 di Setembar dal 1223, Bertolt di Andechs, patriarcje di Aquilee, al implantà il Marcjât che al fo la lidrîs de Citât di cumò, cjapant dentri cul timp lis localitâts dongje: e prime la Vile cun non compagn; e po, tal Tresinte, ancje chês che ur disevin Disore e Disot, Graçan e Praclûs; ancjemò, tal Votcent, ur tocjà a Beivârs, Cjavriis, Cussignà, Godie, Padier-Vât e S. Bernart.
Dai studis chei ultins, il sît di Udin al pararès che al vedi trê mil agns almancul, ma, sot l’aspiet juridic-politic, chel al scomençà il so svilup urban nome che partint di chei 13 di Setembar cuant che il patriarcje Bertolt li al fissà un pivot di citât, strolegant par chel, salacor, un destin di erêt de funzion di Aquilee tal grim de Mitteleurope. Daûr de Pâs di Cjaurià dal 1221, passât ribalton feudâl di chei trements, il prevost regnant, cun biele sperance di rivâ a imbrenâ la nobiltât cjaviestre, al ricognossè un Parlament furlan – il prin comandin in Europe e complet come cuarps sociâi – li che al jere dentri ancje il borghesam, sperât so partidant, che lu favorì ancje ben pastanant chê citât-marcjât di Udin, slargjade in pôc timp e parfin “zimulade” cun chê metropoli di Aquilee viere oltri che furnide di une autonomie di guvier in forme di condomini di sovranitât e salacor ancje za di costituzion par borcs. Nobil bavarês, predeçon in grant, parint cence mancul dai rês di France e Ongjarie, Bertolt, patriarcje e princip di une Aquilee sorestante tra Italie e Austrie, Cravuazie e Slovenie di vuê, al ospità in chel so Udin – che al varès cirût ancje di ingrandîlu juste come glesie oltri che marcjât e guvier di popul – l’amì so imperadôr gjermanic-roman Fidrì “Stupor Mundi”!
Gustose liende e vûl chel patriarcje ancje propit pari furlan dal Tokaij ongjarês, regâl dal prelât di Aquilee par Bele, so nevôt, sovran ongjar. Sul tombâl di Bertolt famôs, jentrant te Basiliche di Aquilee, là che si inçopedà e
che al colà par tiere la dì dal so ingrès, lu ricuarde une targhe metude dai siei paisans di Baviere e, in chescj agns, une gale cui colôrs di Udin, regâl di libare iniziative civiste…
Cheste la liende dal patriarcje ghibelin passât vuelf, sul incrôs de Europe, par rivâ a parâsi di aleâts ben piês dai nemîs che al veve. Cheste la liende dal fondadôr udinês “sitadin” e ancje ben dal istès Parlament furlan. E ven fûr di li la citât di Udin, mismàs latin, gjermanic e slâf su chel troi gloriôs di “Aquileia Mater” e ben di Cesar, primarûl pari di un “Forum Iulii” trassunt di Europe. Udin, Comun citadin plui potent e inventîf tune Patrie dal Friûl feudâl, malcuiete frontiere di civiltâts, formis di guvier e svindics sociâi: menade apassionant che chei 13 di Setembar i àn dade une volte pursì momentose, sigurant ai furlans riferiment gnûf e ancje disinvolt, sigûr ben o mâl, dentri de lôr storie, cun timps promiedis di democrazie e partecipazion di spieli par vuê juste a adiriture.
(Aprofondiment par cure dal prof A. Travain)
