Sabide ai 27 di Setembar, aes 15.30, apontament cun “Bon Complean Maman!“: laboratori creatîf inmaneât de ARLeF.
Ae Fieste dal Miluç di Tumieç al torne un dai apontaments che i fruts a spietavin di plui: il laboratori creatîf di Maman! In ocasion de 29e edizion de manifestazion che e animarà il cûr de citât cjargnele par dut il fin di setemane, i plui piçui a saran protagoniscj di un dopomisdì speciâl, plen di zûcs, fantasie e lenghe furlane.
Sabide ai 27 di Setembar, aes 15.30, sot dal tendon in place XX di Setembar, al tacarà il laboratori ludic didatic inmaneât de ARLeF, in colaborazion cun Telefriuli.
La iniziative si intitularà “Bon complean Maman!” e e fasarà part dai tancj events inmaneâts de Agjenzie cun chê di fâ fieste pai 10 agns de trasmission televisive in lenghe furlane cetant preseade dai fruts. La diesime stagjon e scomençarà vinars ai 10 di Otubar. Protagonistis di cheste “fieste di complean” speciâl a saran la famose condutore Daria Miani, la sô “vicine di cjase” Desiree Chiappo Debegnach. Insiemi a coinvolzaran i plui piçui intun laboratori divertent pensât pai fruts dai 4 ai 10 agns. No mancjaran sorpresis e gadgets par ducj i fruts che a parteciparan!
