La cuarte edizion de publicazion in version furlane (une des dîs lenghis che e je stade voltade, dongje dal inglês, francês, spagnûl, todesc, portughês, gjaponês, cinês, arabic e sart) e je nassude ancje chest an in graciis de colaborazion tra la Agjenzie Regjonâl pe Lenghe Furlane, che e à curade la traduzion, il Comant de Legjon Carabinîrs “Friûl-Vignesie Julie” e la Regjon Autonome Friûl-Vignesie Julie.
A son i “Erois di ogni dì” i protagoniscj dal Calendari Storic de Arme dai Carabinîrs pal 2026, che al vûl jessi un omaç a cui che, ogni dì, al è a servizi dal Paîs, intes citâts e intai piçui comuns, in Italie e tal forest. Feminis e oms de Arme che, cidins, a son a disposizion de comunitât. ma ancje “un simbul tangjibil de sintesi madressude tai agns fra la Arme dai Carabinîrs, istituzion statâl par antonomasie, e la culture furlane, patrimoni identitari di une comunitât che e je braurose sedi dal so patrimoni etic morâl che de sô integrazion tal contest nazionâl plui larc“, come che al evidenzie il gjenerâl di brigade Gabriele Vitagliano.
L’impegn, la professionalitât e la umanitât des feminis e dai oms de Arme a vegnin fûr de union fra la art e la leterature che e je presinte tes pagjinis dal Calendari. Une conte di lavôr e sperance realizade dal artist René (Luigi Valeno), calcolât tant che il mestri de gnove Pop Art taliane.
I tescj che a compagnin lis disenûf taulis a son afidâts, ancje pal 2026, ae pene dal scritôr Maurizio De Giovanni. La conte si disvilupe midiant di une letare che un zovin Carabinîr, arolât di pôc, al mande ai siei gjenitôrs, là che al sclarìs lis motivazions de sô sielte e l’esempli che al gjave fûr de sô esperience. Dongje dai tescj di De Giovanni, la edizion 2026 dal Calendari e à ancje une prefazion firmade dal gjornalist e scritôr Aldo Cazzullo, che al da un pont di viste storic e valoriâl su la Arme. La postfazion e je stade afidade a un altri scritôr e gjornalist impuartant, Massimo Lugli che, doprant un episodi vivût in prime persone, al conte la mission che ogni dì i Carabinîrs a esemplifichin tal concret.
Il Calendari al è une publicazion che di simpri e je une vore domandade. Screade tal 1928, e rive chest an ae sô edizion numar 93, dopo de interuzion postbeliche dal 1945 al 1949. Tornade a tacâ in maniere regolâr tal 1950, di chê volte e je stade interprete puntuâl des vicendis de Arme e, midiant di chest, de storie dal Paîs.
