Presentade la edizion numar 49
Lis celebrazions uficiâls de Fieste de Patrie dal Friûl 2026 si davuelzaran tai Comuns di Dartigne e Montenârs, domenie ai 12 di Avrîl.
Lis cerimoniis religjosis e civîls a ricuardaran i 949 agns de costituzion dal Stât patriarcjâl furlan, fondât ai 3 di Avrîl dal 1077. La iniziative e je organizade chest an dai Comuns di Dartigne e di Montenârs, cu la poie de Regjon Autonome Friûl-Vignesie Julie e de ARLeF, in colaborazion cul Istitût Ladin Furlan “Pre Checo Placerean”.
E sarà une edizion cuntun valôr simbolic fuart che, tal 50m aniversari dal taramot dal 1976, e puartarà i partecipants a Dartigne, cu lis sôs fortificazions antighis, i rescj medievâi e i reperts archeologjics, e a Montenârs, teritori inserît te Riserve de Biosfere Unesco e siôr di testemoniancis storichis e culturâls, e ancje lûc di nassite di pre Checo Placerean, figure di riferiment dal autonomisim furlan, tradutôr de Biblie in lenghe furlane e ideadôr de Fieste de Patrie, ricognossude in maniere uficiâl de Regjon dal 2015 indenant.
IL PROGRAM DES CELEBRAZIONS
Aes 9.00 a Dartigne, in vie Piacenza, devant de sede dai Alpins, i partecipants si cjataran par scomençâ la zornade cul tradizionâl alcebandiere dal vessil dal Friûl, cul acompagnament de Filarmoniche “Luigi Mattiussi”, direzue dal mestri Herbert Fasiolo. Daspò, aes 9.30, te glesie de Nativitât di Sante Marie, e sarà celebrade la Sante Messe in lenghe furlane, compagnade dal Grup Corâl “Spengenberg” di Spilimberc, cu la partecipazion dai rapresentants des trê diocesis dal Friûl e cun leturis e orazions ancje par sloven e todesc.
Dopo de messe, aes 10.45, in place Marnico, e je previodude la esibizion dal Grup folkloristic “Balarins de Riviere”. Aes 11.00, tal Gnûf Teatri Bonsignôr Lavaroni, e scomençarà la celebrazion civîl cu la esibizion de band folk rock Corte di Lunas, che e interpretarà l’Imni dal Friûl. Po dopo e sarà la leture de bole imperiâl, cul Grup storic “Il Barbacane” e i tamburs de “Cucurbite sonorae” di Vençon. Infin, dopo dal scambi tradizionâl de bandiere tra il sindic dal Comun di Sacîl (organizadôr tal 2025) e chei dai Comuns di Dartigne e Montenârs, a saran i salûts des autoritâts presintis.
Cui che al volès stâ daûr al event di cjase, al podarà sintonizâsi su la trasmission “Il campanile della domenica” in onde su Telefriuli (cjanâl 11) che des 9.30 al trasmetarà sedi la liturgjie che la cerimonie civîl.
La zornade e larà indevant a Montenârs dulà che, aes 13.00, te aree des fiestis di Borc Curminie, si tignarà il gustâ organizât de Pro Montenars. Il moment al varà ancje la presince di Dario Zampa (prenotazion obligatorie dentri dai 9 di Avrîl a istitutladinfurlan@libero.it).
Tal dopomisdì, aes 15.30, si tornarà a Dartigne par une cjaminade storiche archeologjiche par cure de cooperative Riscoperte, cun partence dal Teatri Lavaroni e un percors che al tocjarà il cuel di Sant Martin, il Cjistiel Savorgnan e il parc archeologjic (prenotazion obligatorie scrivint a info@riscoperte.it).
I Comuns di Dartigne e Montenârs a promovin ancje une schirie di apontaments che a anticipin lis celebrazions uficiâls dai 12 di Avrîl.
Come ogni an, la celebrazion de Fieste de Patrie dal Friûl e sarà insiorade di un calendari plen di events culturâi colaterâi. Plui di 150 iniziativis, tant che spetacui teatrâi, events musicâi, presentazions editoriâls e tant altri, a saran promovudis di plui di 80 Comuns che a àn aderît al bant pe poie aes manifestazions che a compagnin cheste ricorence, promovude de ARLeF metint in vore la Leç regjonâl n. 6/2015.
