Presentade la edizion numar 48
Lis celebrazions uficiâls de Fieste de Patrie dal Friûl 2025 si fasaran tal Comun di Sacîl, domenie ai 6 di Avrîl.
La cerimonie religjose e chê civîl a ricuardaran i 948 agns de costituzion dal Stât patriarcjâl furlan, fondât ai 3 di Avrîl dal 1077, come che al è stât marcât in ocasion de conference stampe di presentazion dal program de Fieste, simpri siôr di events. La iniziative chest an e je inmaneade dal Comun di Sacîl, de Regjon Autonome Friûl-Vignesie Julie e de ARLeF, in colaborazion cul Istitût Ladin Furlan “Pre Checo Placerean”.
Vê sielzût Sacîl par celebrâ il Friûl al à un valôr une vore simbolic stant che, ai 8 di Novembar dal 1366, il patriarcje Marquart di Randeck al veve sielzût propit la citât dal Friûl Ocidentâl par promulgâ lis Constitutiones Patriae Fori Iulii, ven a stâi il codiç dal dirit furlan, restât in vore fin al 1797.
IL PROGRAM DES CELEBRAZIONS
Domenie ai 6 di Avrîl, lis celebrazions a tacaran in Place Sant’Odorico, aes 9.30. I partecipants si cjataran li e, aes 9.45, si fasarà il tradizionâl alcebandiere de bandiere dal Friûl, cul acompagnament dal Grup dai Alpins di Sacîl e dal Istituto Filarmonico Città di Sacile. Po dopo, aes 10, al sarà il moment de Messe, celebrade dai rapresentants des trê diocesis dal Friûl, cun leturis e preieris par furlan, sloven, todesc e venit. La funzion e vignarà acompagnade dal Grup Corâl Spengenberg di Spilimberc. Ae fin de messe, aes 11, al partissarà il corteu compagnât dal Istituto Filarmonico Città di Sacile. Al larà bande la Loze dal Municipi, in place dal Popul, dulà che, aes 11.15, al è in program il salût di benvignût ai ospits e a ducj i presints, cul acompagnament dal Coro Livenza. Aes 11.45, tal Teatri Ruffo (Plaçute Antonio Pasqual, 22) a scomençaran lis celebrazions civîls: si sunarà l’imni dal Friûl, cjantât de talentuose mieç sopran Valentina Volpe Andreazza, e si leiarà la Bole imperiâl, par cure de Pro Castello di Cjanive e cu la partecipazion de Schola Tamburi storici di Conean. Dopo dal tradizionâl scambi de bandiere tra il sindic dal Comun che al à dât acet ae manifestazion l’an prin (Tarcint) e chel che le ospite chest an, lis tantis autoritâts presintis a fasaran ognidune il so salût.
📺 Cui che al vûl stâ daûr al event di cjase, al podarà fâlu cjalant il speciâl “Fieste de Patrie”, in onde su Telefriuli (canâl 11) che des 9.45 e trasmetarà in direte sedi la liturgjie, sedi la cerimonie civîl. 📺
Dopo dal gustâ, tai ristorants dal centri storic cuntun menù a presit concuardât, si podarà partecipâ aes visitis vuidadis inmaneadis de Associazion Guide Nord-Est.
Cun di plui, tal Palaç Ragazzoni si podarà visitâ in autonomie la impuartante mostre di art “Stralûs. 1985-2025 Arte in Friuli / Art in Friûl” (vierte des 15 aes 19).
A Sacîl, tal percors che al puartarà fin ai 6 di Avrîl, a son in program ancje une schirie di events colaterâi. Discuvierziju tal program che tu cjatis ca sot.
Cirche 200 events colaterâi a son in program ancje su dut il rest dal teritori furlan in ocasion de Fieste de Patrie dal Friûl. Spetacui teatrâi, events musicâi, presentazion di libris, laboratoris pai plui piçui e tant altri. A son promovûts di passe 100 Comuns, ancje in graciis dal bant pal sostegn aes manifestazions che a compagnin la ricorence, mandât fûr de ARLeF in atuazion de Leç n. 6/2015.
Consulte i materiâi
| Ogjet | Cjale |
| Fieste de Patrie 2025 - Program des celebrazions uficiâls ai 6.04.2025 |
|
| Fieste de Patrie 2025 - Program dai events colaterâi organizâts tal Comun di Sacîl |
|
