Sabide ai 13 di Setembar, aes 11.00, te cort di Palaç Morpurgo, tal spazi Coldiretti F-VJ l’apontament al è cun “Dolçs furlans… Cui ju cognossial? – Scaletarie de tradizion. Liendis e segrets”. Un viaç golôs fra storie, curiositâts e savôrs.
Il condutôr dal event al sarà Marcutti, il “Friulencer” cun milions di visualizazions, une ironie vivarose e… tant Friûl. I protagoniscj a saran Nicolas Fonzar, cognossût pal canâl Youpaltubo, che aromai al è un dai canâi YouTube plui preseâts dai furlans, e Danilo D’Olivo, storic scaletîr di Il Laboratorio del Dolce di Udin.
Fonzar, che te sô rubriche Mangjâ e murî al invide in mût inmagant e apassionât a scuvierzi la origjin di plats e prodots dal teritori, al presentarà in anteprime un gnûf video, che al è dedicât propit ai dolçs furlans.
D’Olivo, grant artesan dal gust che si misure di simpri cun ricetis antighis de nestre tradizion, al contarà al public storiis e segrets de scaletarie furlane, cuntune atenzion particolâr ai biscots. Al alternarà ricetis che lui stes al à cjapât sù di fonts locâls tal cors de sô lungje cariere, cun altris, tiradis fûr dal volum “Mangiare e ber friulano”, ricetari innomenât de cusine tradizionâl furlane, scrit de contesse Giuseppina Perusini Antonini.
Pal public di Friuli Doc e sarà pardabon une biele ocasion par scuvierzi cualchi dolç aromai pôc cognossût, di chei che si fasevin une volte pes fiestis impuartantis. Come i “colaçs”, i biscots che a vignivin leâts insiemi par formâ une golaine e metûts tor il cuel dai zovins che a lavin di Cresime. Dut câs e sarà soredut la ocasion par cerçâju, stant che ae fin dal event e sarà une degustazion.
Par dute la durade de manifestazion, la ARLeF e sarà presinte tal spazi “Furlan DOC – La vetrine de lenghe furlane a Friuli DOC“. Coordenade dal Comun di Udin, la iniziative e met adun ents, associazions e editôrs impegnâts te promozion de lenghe furlane. Il bancut, logât in vie Marcjât vieri, al sarà juste apont une vetrine de lenghe furlane che e fasarà scuvierzi tantis novitâts, ativitâts e materiâi informatîfs promovûts di dutis lis realtâts che a partecipin. Il spazi al restarà viert joibe ai 11 di Setembar des 18 aes 22 e di vinars a domenie cun orari continuât des 10 aes 22.
Consulte i materiâi
| Ogjet | Cjale |
| Discuvierç ancje l'event de ARLeF a Friuli Doc dedicât ai plui piçui |
|
