Al è finît di pôc, a Cagliari, “Parla Corto!“, il festival dedicât ai curtmetraçs realizâts tes lenghis minoritariis de Italie di regjiscj cun mancul di 36 agns, organizât di RAI Sardigna.
Il prin classificât di cheste seconde edizion dal festival al è stât (ex aequo) un curtmetraç in lenghe furlane: “Claps e peraulis” di Stefano Giacomuzzi. Il documentari, su la poete Rosanna Paroni Bertoja, al è produsût di Agherose, cu la poie dal Fondo Audiovisivo FVG e la colaborazion de ARLeF.
Une preseade jurie di esperts e à premiât il curt par furlan, tra lis 24 oparis in concors, “par vê rivât a vinci la sfide di trasponi intun prodot audiovisîf la poesie. Graciis ae passion particolâr che ducj i doi a àn pai claps. Un film delicât, un manifest romantifc e realistic parcè che la poesie e esist ancje cence peraulis”.
Pe ocasion, “Claps e peraulis” al va in onde su la TV par furlan di RAI FVJ, canâl 810 di RAI 3 BIS, martars ai 7 di Otubar dal 2025, aes 21.40 e in repliche vinars ai 10 di Otubar, aes 22.00.
Stefano al è un regjist che i ven comissionât un film suntun sogjet che al considere dificil di meti in sene: la poesie. La protagoniste dal film che i àn domandât di zirâ e je la poetesse Rosanna Paroni Bertoja. Plui di cincuante agns a separin Stefano e Rosanna, epûr i doi a condividin une passion particolâr, chê pai claps. Stefano nol sa cemût fâ un film su Rosanna, ma al sint di scugnî partî di cheste strane passion che ju unìs. Il regjist, in prin restîf a fâ un film su Rosanna, al capìs di vê cjatât in jê une vuide. Cussì, al ven fûr un film sempliç e delicât che si costruìs sot dai voi dal spetatôr. Un ritrat di une poetesse che no le viodìn mai a scrivi poesie: cuant che si cjacare di poesie, lu si fâs cjacarant di claps. Parcè che, come che e crôt Rosanna, la poesie e esist ancje cence peraulis.
