Il secont apontament de ARLeF a Friuli Doc 2025 al è dut dedicât ai fruts, cuntune fieste…speciâl!
L’event “Bon complean Maman!” si fasarà sabide ai 13 di Setembar, aes 16.30, te Sezion Moderne de Biblioteche Civiche “V. Joppi“. Al sarà un dopomisdì di zûcs e animazion par furlan dedicât ai plui piçui e aes lôr fameis.
L’event, inmaneât de ARLeF in colaborazion cul Comun di Udin, cu la Biblioteche e Telefriuli, al festezarà i 10 agns de trasmission televisive par furlan “Maman!”, che ur plâs tant ai fruts. La diesime stagjon e tacarà propit in Otubar.
Protagonistis di cheste “fieste di complean” a saran la famose condutore Daria Miani, la sô “vicine di cjase” Desiree Chiappo Debegnach e la vivarose “cusine Bete“. A cjaparan dentri i fruts intun laboratori divertent e no mancjaran sorpresis e gadgets par ducj.
Il laboratori al è indreçât ai fruts dai 4 ai 10 agns. Par partecipâ bisugne notâsi dentri di vinars ai 12 di Setembar, scrivint ae direzion email info@sportelfurlan.eu.
Par dute la durade de manifestazion, la ARLeF e sarà presinte tal spazi “Furlan DOC – La vetrine de lenghe furlane a Friuli DOC“. Coordenade dal Comun di Udin, la iniziative e met adun ents, associazions e editôrs impegnâts te promozion de lenghe furlane. Il bancut, logât in vie Marcjât vieri, al sarà juste apont une vetrine de lenghe furlane che e fasarà scuvierzi tantis novitâts, ativitâts e materiâi informatîfs promovûts di dutis lis realtâts che a partecipin. Il spazi al restarà viert joibe ai 11 di Setembar des 18 aes 22 e di vinars a domenie cun orari continuât des 10 aes 22.
Consulte i materiâi
| Ogjet | Cjale |
| Discuvierç ancje chel altri apontament de ARLeF a Friuli Doc |
|
