La ARLeF e va dilunc cu lis ativitâts par meti in vore ad implen la legjislazion di tutele de lenghe furlane e, in particolâr, lis normis leadis al bilinguisim visîf fissadis de leç regjonâl 29/2007.
Par chest, i ents publics dal teritori di lenghe furlane a puedin pandi il lôr interès par firmâ cu la Agjenzie un acuardi di colaborazion daûr dal art. 15 de leç n. 241/1990, presentant une propueste di progjet par comprâ e instalâ:
a) cartelonistiche e insegnis bilengâls difûr dai edificis che a son sede di uficis e di struturis operativis;
b) cartelonistiche informative e turistiche;
c) scritis bilengâls tai mieçs di traspuart
(fin a un massim dal 10% de spese totâl). La segnaletiche stradâl, che e jere za stade tratade in bants precedents, e ven lassade fûr.
La ARLeF e valutarà lis propuestis rivadis su la fonde dai criteris fissâts tal avîs, pe eventuâl concession dai contribûts, fin a un massim dal 85% de spese amissibile e fin a un massim di € 15.000,00.
La ARLeF e metarà a disposizion la consulence linguistiche par che al sedi garantît il rispiet de grafie uficiâl de lenghe furlane e une evidence grafiche compagne tra lis dôs lenghis.
La date di scjadince pe presentazion des domandis e je ai 16 di Setembar dal 2024. Lis domandis a varan di jessi mandadis dome vie Pec ae direzion di pueste arlef@certgov.fvg.it
Par cualsisei informazion si pues clamâ il numar 0432 555812, o scrivi a: arlef@regione.fvg.it
Cliccâ ca sot par viodi l’Avîs public.
Consulte i materiâi
| Ogjet | Cjale |
| Avîs public - promozion bilinguisim visîf |
|
| Modul pe propueste di colaborazion |
|
