Al à non “Ator pal Friûl” e al è il gnûf zûc educatîf in lenghe furlane, realizât di Ubiz3D srls, e finanziât de ARLeF, te suaze dal Bant pal supuart aes ativitâts che a àn tant che obietîf chel di promovi la lenghe furlane tal setôr de Editorie.
Il videozûc al è disponibil online tal sît atorpalfriul.it dopo trê agns di lavôr e un test finâl, che al à impegnât cinc classis de scuele primarie “Guglielmo Marconi” e de scuele secondarie di prin grât “Ugo Pellis” di Cjasteons di Strade, par un totâl di 62 arlêfs.
Al è un progjet indreçât in particolâr ai fruts des classis 3e, 4e e 5e de scuele primarie, ma ancje a chei plui grancj che a frecuentin za la secondarie di prin grât. Un imprest che si integre ad implen cun Anìn!, il prin manuâl pensât par acompagnâ i students de scuele primarie a scuvierzi il furlan, lis peculiaritâts dal teritori, la sô storie e la sô culture.
Zuiâ al è facil. Al baste jentrâ tal sît atorpalfriul.it, sielzi un non utent, une password e tacâ a esplorâ. I zuiadôrs a podaran visitâ in maniere virtuâl une schirie di lûcs dal Friûl, in particolâr, cuatri citadinis: Vençon, Palme, il Borc Cjistiel di Gurize e Cividât. Midiant di 25 minizûcs e di diviers ponts di interès, si podaran imparâ tancj contignûts in lenghe furlane di meti adun intun libri virtuâl speciâl, dulà che lis pagjinis a permetaran di viodi ce che al è stât cjapât sù e il stât di avanzament tal serious game, o zûc educatîf. I zuiadôrs a puedin otignî fintremai 41 ricognossiments virtuâi che a vegnin dâts se si puartin insom obietîfs specifics.
I piçui a impararan cussì liendis, detulis e ancje peraulis particolârs o che aromai si doprin pôc, judâts di vuidis speciâls, tant che Pauli Diacun, Jacum Linùs, Ippolito Nievo, Lucine Savorgnane, Catarine Percude e pre Carli Dorligh, che al à ispirât il progjet. Cun lôr, a compagnâ il zuiadôr a saran ancje figuris magjichis tant che lis Aganis o i Sbilfs, o il Tiliment, dulà che si podarà fâ un rafting virtuâl. A son personaçs che, in part, i plui piçui a àn za cognossût propit cun Anìn!.
