fbpx

A vicino/lontano ancje lis lenghis a son protagonistis cul event dopli de ARLeF

Furlan, sart e ebraic. Tal cûr dai doi apontaments che la ARLeF e puartarà a vicino/lontano, vinars ai 5 e domenie ai 7 di Mai, a saran lis lenghis. La presince de Agjenzie al festival si conferme salde ancje tal 2023.

Di cuasi dîs agns, la ARLeF cui siei apontaments e ponte la atenzion sul teme dal plurilinguisim ancje inte programazion di vicino/lontano. Lu à fat cun lengaçs diferents (dal teatri al dibatiment), invidant inteletuâi e studiôs impuartants par che si confrontin sul argoment. Di an in an la Agjenzie e à simpri viert ae riflession su svariâts aspiets linguistics, culturâi e identitaris che a caraterizin un teritori multilengâl tant che chel dal Friûl-Vignesie Julie e ancje chest an e fasarà la sô part in chest.

VINARS AI 5 DI MAI “S’intelligèntzia de Elias: un caso letterario dalla Sardegna”, il prin apontament par cure de ARLeF, al è in program ai 5 di Mai aes 18, tal Salon dal Popul.
Al sarà un incuintri su la leterature in lenghe minoritarie tacant de opare che forsit e à cambiât par simpri chê sarde: “S’intelligèntzia de Elias” (Janus 2022) di Giuseppe Corongiu. Al è un zâl distopic ambientât tra il 2030 e il 2038. L’autôr al maravee pe sô maniere moderne di doprâ la lenghe sarde tal frontâ lis tematichis contemporaniis e par une leterature che e cor vie ancje par chei che no son esperts de materie. L’atôr Paolo Mutti al leiarà cualchi toc de opare voltât par furlan intant che l’autôr – scritôr, gjornalist, tradutôr, autôr di cetancj saçs su la difese e la promozion des minorancis linguistichis – al fevelarà cul scritôr furlan Gianluca Franco su lis prospetivis des leteraturis minoritariis, fûr di schemis oleografics e di clichè. A fâ di moderadôr al sarà Gabriele Zanello, docent di leterature furlane te Universitât dal Friûl.
Graciis ae colaborazion cul Circolo Sardi “Montanaru” di Udin ae fin dal incuintri e je previodude ancje une cerce di prodots sarts.

DOMENIE AI 7 DI MAI – De colaborazion tra la ARLeF e la Associazione Italia-Israele di Triest e je nassude invezit la idee dal secont apontament inte suaze di vicino/lontano: “La lingua che visse due volte“, in program ai 7 di Mai, aes 10, tal oratori dal Crist. Vie pal incuintri si tornarà a percori il viaç de lenghe ebraiche plen di vicendis di no crodi. Daspò dal salût di Sergio Salerno, vicepresident de Associazione Italia-Israele di Triest, a intervignaran Anna Linda Callow – docente di Lenghe e leterature ebraiche te Universitât Statâl di Milan – e Eliahu Alexander Meloni – che dal 2016 al è Rabin a cjâf  de Comunitât Ebraiche di Triest e dal F-VJ – moderâts dal gjornalist Walter Tomada.
Dal dialic fra i presints si podarà scuvierzi cemût che ae fin dal secul XIX, dopo cuasi doi milenis di vite, l’ebraic al jere doprât dome par motîfs religjôs o di studi, ma nissun lu fevelave tant che lenghe corinte. Intal 1948, deventât lenghe uficiâl di Israêl, la sô storie e à cjapade une gnove strade. In dì di vuê l’ebraic al è doprât in ducj i cjamps de vite sociâl, in particolâr inte leterature, cun romançs e saçs voltâts in dut il mont.



Stanus Daûr

Components ARLeF

ARLeF

Agjenzie Regjonâl pe Lenghe Furlane

vie della Prefettura, 13

33100 Udin

tel. +39 0432 555812

codiç fiscâl: 94094780304