1. +Sklet/XtremeTV

Canyoning tal Cjanâl di Racolane

Regjie di Giorgio Cantoni
Une produzion di Informazione Friulana soc. coop.
Cul finanziament di ARLeF Agjenzie Regjonâl pe Lenghe Furlane
Dvx 20 minûts – 5 pontadis

La serie televisive +Sklet/XtremeTV e propon un viaç inmagant tra lis dissiplinis sportivis plui origjinâls che si pratichin in Friûl.
Lis escursions inte varietât dai ambients naturâi che a caraterizin il teritori, a puartin i spetatôrs a discuvierzi cinc ativitâts sportivis diferentis, e cun chês si va indentri a plen tal ambient naturâl dulintor e si esplorin lûcs che se no a saressin cuasi inacessibii.
Tra lis particolaritâts dai sports protagoniscj de serie, la “spetacolaritât” e il plen rispiet pal teritori a son i elements che a vegnin fûr des intervistis fatis ai sportîfs e de sperimentazion direte des dissiplinis di bande dai stes presentadôrs dal program.
In ogni pontade, il viaç dentri di un microcosmi fat di personis, lûcs e ativitâts si siere cu la discuvierte di contescj particolârs di ospitalitât turistiche, sedi di un pont di viste culturâl, che di ambient e di teritori.
La trasmission e je caraterizade di un lengaç televisîf svelt e moderni e e je condusude in lenghe furlane.

Canyoning tal Cjanâl di Racolane
Al scomence ta cheste pontade il viaç curt ma une vore ecitant tra i salts di aghe e i foradôrs dal Riul Malimberg intal Cjanâl di Racolane, intes Prealps Juliis, jenfri lis parêts de cjadene dal Cimon a Nord e de Mont Cjanine a Sud. Vie par cheste aventure spetacolâr a vegnin presentâts ambients magjics e salvadis, siôrs di incjant e di bielece. Cun Tommaso Pinat e Sebastiano Broili de Associazion CanyonEAST si va ae discuvierte dal mont maraveôs dal canyoning, une specialitât sportive a mieç fra alpinisim e speleologjie, che e met dongje mont e aghe.

Diretôr di produzion: Paolo Cantarutti
Coordenadore de edizion: Federica Vincenti
A presentin: Francesca Battistutta e Cristian Pressacco 

Ta cheste pontade:
Tommaso Pinat (www.canyoneast.it)
Sebastiano Broili (www.canyoneast.it)
 
Trasmetude da RAI 3 Regjonâl intal 2015 e intal 2016.