NO STÂ A FÂTI CONTÂ LA STORIE DAL ORS:
VEN SU YOUPALTUBO!

YoupalTubo al è il canâl YouTube “made in Friûl” animât di 10 zovins youtubers e siôr di contignûts creatîfs e stimolants che a cjapin dentri fantats e fantatis furlanis, ma no dome. Cu la campagne di informazion multicanâl No stâ a fâti contâ la storie dal ors: ven su YoupalTubo!, la ARLeF e vûl incressi la popolaritât dal canâl che al à za milions di visualizazions. Ma, soredut, e smire a infuartî il so leam cu lis gnovis gjenerazions, mostrant che lis storiis e i protagoniscj dal Friûl, tant che la lenghe cu lis sôs sfumaduris e i siei significâts, a puedin jessi argoments tratîfs, bogns di incuriosî i zovins e di cjapâju dentri simpri di plui.

• Discuvierç di plui

  Cui siei tancj contignûts – lis rubrichis a van daûr des passions dai protagoniscj dai videos – YoupalTubo al pant trop che il furlan al sedi une lenghe par zovins, intun viaç che nus mene a discuvierzi storiis grandis e piçulis, curiosis o contadis pôc, personaçs innomenâts o discognossûts, bielecis de nature, il mangjâ e i prodots de tradizion e tant altri. Cun di plui, al sburte cui che nol cognòs ben il furlan a cjapâ pratiche e cui che lu fevele za ogni dì a imparâlu inmò miôr.
  Une campagne che e cjape dentri la tv, la radio, la stampe su cjarte, il web e i social media nus invide a esplorâ il mont di YoupalTubo.

CAMPAGNE SOCIAL

Chei di Udin, ven a stâi Mattia Cantarutti e Federico Iob, ispirâts dal Quiz Mortale, il format che ju à fats deventâ famôs, a partissin par une gnove sfide: isal cualchidun che al fevele furlan a Triest?
I protagoniscj dal video TikTok, sbarcjâts sul Molo Audace, a balinin par Place Unitât e pes viis dal centri storic par intervistâ int di ogni etât. I doi si intivin fintremai cul “coleghe” Max Sganga, un innomenât youtuber triestin.

• Discuvierç di plui

  Interogâts su peraulis e mûts di dî furlans, i intervistâts a acetin vulintîr di stâ al zûc e di misurâsi cu la marilenghe rispuindint aes domandis dai doi youtubers furlans. Ce che al salte fûr e je une narazion lizere, un tic sureâl, cuntun stîl ritmât e divertent. Propit un Quiz Mortâl, une sfide “ai confins cu la realtât” puartade indenant cun simpatie, in maniere scherçose e cuntun fregul di matetât.

  La strategjie social e previôt la difusion dal video “Parlare friulano a Trieste” tal canâl TikTok, fat di pueste par chê plateforme, tai canâi Facebook, Instagram e YouTube (shorts) e midiant dal canâl di messagjistiche WhatsApp.

SPOT TV

Il spot al è un concentrât di tocuts di filmâts gjavâts fûr di videos di YoupalTubo e in 30 seconts al rive a trasmeti al spetatôr la ricjece di contignûts dal canâl. Une daûr di chê altre, a passin a dute corse lis musis de plui part dai zovins protagoniscj di YPT; cul lôr snait che al fâs propit vignî voie di cori a viodi i videos tal canâl YouTube di YoupalTubo.

• Discuvierç di plui

  Chê Storie, Fûr la lenghe, Mangjâ e Murî, Quiz Mortale, Geo&Nature… a son i formats dai videos che a son stâts sielzûts par creâ il spot interpretât di Lucia Bello, Federico Benedet, Mattia Cantarutti, Desiree Chiappo Debegnach, Davide Buccheri, Nicolas Fonzar, Federico Iob e Diego Scarsini.

SPOT RADIOFONIC

Tant che il spot tv e la campagne Adv, ancje il spot radiofonic al sburte il public a esplorâ il canâl YoupalTubo. Par fâlu, lu traspuarte intun famôs quiz imagjinari. La concorinte e fale la rispueste e e piert un premi sensazionâl. Sfortunade o impreparade? Se e ves savût dal canâl – al comente cui che i sta daûr ae trasmission – e varès sigûr dât la rispueste juste!

• Discuvierç di plui

  La idee di fonde dal spot e rimande in maniere clare al sproc “No stâ a fâti contâ la storie dal ors: ven su YoupalTubo!”. Lis vôs a son chês di Claudio Moretti, Mauro Missana, Desiree Chiappo Debegnach e Veronica De Giorgio.

ADV

CREDITS

---