Se no ti ven sù la peraule juste… cirile tal puest just!

Il SuperDizionari de lenghe furlane al è la plui potente plateforme online su la lenghe furlane che, midiant di une uniche interface, e permet di acedi ai contignûts di trê fondamentâls risorsis digjitâls: il Grant Dizionari Bilengâl Talian – Furlan, il Dizionari de Lenghe Furlane (Monolengâl) e il Dizionari dai Cognons. Gratuit, svelt e intuitîf, al è realizât de ARLeF – Agjenzie regjonâl pe lenghe furlane e si lu pues consultâ su cheste pagjine web dal sît de ARLeF Superdizionari.arlef.it. 

“Se no ti ven sù la peraule juste… cirile tal puest just!” e je la campagne di informazion realizade de ARLeF par fâ cognossi al public il SuperDizionari, par che ducj a puedin doprâlu in ogni ocasion e in ogni contest.

• Scuvierç di plui

  Il SuperDizionari de lenghe furlane al è realizât de ARLeF – Agjenzie regjonâl pe lenghe furlane, in atuazion dal Plan gjenerâl di politiche linguistiche pal furlan de Regjon Autonome Friûl-Vignesie Julie.
  Il Grant Dizionari Bilengâl Talian – Furlan al è un dizionari bilengâl une vore complet par numar di lemis e profonditât des descrizions, che al à dentri definizions, esemplis e une fraseologjie pardabon siore, tal rispiet de grafie uficiâl de lenghe furlane; il Dizionari de Lenghe Furlane al è un dizionari monolengâl che al descrîf in maniere analitiche lis acezions e al ufrìs cetancj esemplis; il Dizionari dai Cognons al è une vere enciclopedie dai cognons cun nons, riferiments storics, spiegazions etimologjichis, studis gjeografics e altris informazions e curiositâts.

VIDEO PE CAMPAGNE SOCIAL

Protagonist dal video “Se no ti ven la peraule juste… va sul SuperDizionari de lenghe furlane” al è SuperD, un supereroi cun podês straordenaris che al interven par sugjerî la peraule furlane juste a chei che a fasin fature a visâse.

• Scuvierç di plui

  Come ducj i supererois al à une super identitât, un costum che al è une icone tai colôrs dal Friûl e une super Vespa, che al pilote ae velocitât de lûs par puartâ insom la sô mission.
  SuperD al è interpretât dal atôr Paolo Mutti, che in maniere sigure e lizere al impersone la essence dal supereroi. Lu viodìn saltâ fûr come par magjie prin par judâ trê students impegnâts intune aule di studi, po une siore che e je daûr a fâ spese di pomis e infin un nono che al à compagnât i siei doi nevoduts tal parc. A ducj, ur regale propit la peraule par furlan che no ur vignive iniments!

CAMPAGNE WEB 

L’eroi SuperD al è ancje il protagonist naturâl de campagne web programade tes principâls testadis online dal teritori di lenghe furlane. Al è di proposit un archetip di supereroi: svelt, empatic, invincibil, ma simpatic. Al invide ducj a jentrâ tal sît de ARLeF, il puest just par scuvierzi la fruibilitât dal SuperDizionari de lenghe furlane, la sô clarece e la rapiditât tal sugjerî simpri e in ogni câs… “la peraule juste”.

• Scuvierç di plui

  Midiant di banners animâts che a cjapin dentri e che a fasin un ûs strategjic de call-to-action (CTA), i utents a vegnin indreçâts in automatic te pagjine dal SuperDizionari tal sît de ARLeF.

SPOT RADIOFONIC

Il spot radiofonic al sclarìs daurman l’obietîf de campagne: al invide, massime cui che nol cognòs ancjemò ben il furlan, a consultâ il SuperDizionari ogni volte che… “nus mancje la peraule!” ma ancje a interogâ il Dizionari dai Cognons par scuvierzi il significât, la origjin e lis curiositâts sul propri cognon.

SOCIAL MEDIA

La strategjie di social media marketing e previôt une impuartante difusion dal video “Se no ti ven la peraule juste… va sul SuperDizionari de lenghe furlane” in particolâr su TikTok e, in modalitât shorts, tal canâl YouTube. Ma no dome, daûr de planificazion il video al vignarà trasmetût ancje tai canâi Facebook e Instagram.

• Scuvierç di plui

  La campagne social si davuelzarà tes plateformis digjitâls par cuatri setemanis. La distribuzion dal video e je stade previodude ancje midiant dal canâl di messazistiche WhatsApp.

CREDITS

• Scuvierç di plui

  Coordenament gjenerâl
  ARLeF-Agjenzie regjonâl pe lenghe furlane
  William Cisilino
  CALT
  Adriana Cruciatti

  Video de Campagne
  Scrit di: William Cisilino
  Regjie: Giorgio Milocco

  Produzion: Quasar Corporate
  Organizazion gjenerâl: Andrea Badin
  DOP: Nicola De Prato
  Fonic: Francesco Morosini
  Musiche: Giorgio Milocco e Keir Klassow
  Focus Puller: Marjiana Brajkovich
  Eletricist: Simone Belfio
  Editing, compositing e color correction: Filippo di Primio
  Compositing: Alessandro Canzutti
  Imbeletadôr: John Pena Giraldo
  Stylist: Miriam Causero

  Durade: 1.40 min
  Lenghe: furlan

  Interpretis:
  Paolo Mutti

  Davide Buccheri
  Desiree Chiappo Debegnach
  Alba Chiara Rizzati

  Sylvia Panacione

  Danilo D’Olivo
  Lorenzo D’Olivo
  Filippo D’Olivo

  Vôs dal claim finâl:
  Valentina Pagani

  Un ringraciament a:
  ABAUD – Academie di Bielis Arts G. B. Tiepolo di Udin
  Boutique della Frutta Sas di Andrea Freschi & C.

  Spot Radiofonic
  Produzion: Radio Punto Zero
  Scrit di: William Cisilino
  Durade: 30”
  Lenghe: talian

  Campagne grafiche
  Anthes

  Consulence linguistiche
  Sportel regjonâl pe lenghe furlane
  Veronica De Giorgio

  Aministrazion
  Federica Del Pino (ARLeF)

  Graciis a:
  Giulia Della Mora (CALT)
  Sabina Pituello (CALT)

monte su la vespa
il SUPERDIZIONARI ti spiete!

---