Teatri

Un tra i prins tescj poetics par furlan – dal secul XV – al è un contrast a dôs vôs (masculine e feminine) in forme di dialic amorôs tra i personaçs e, par vie di cheste struture, al podarès jessi considerât tant che il prin aboç di un toc destinât ae rapresentazion. Tra il ‘500 e il ‘600 in Italie e nas la Comedie de art che e rapresente il so timp cun vizis e virtûts, metint in sene spetacui alegorics ispirâts ae vite cuotidiane de epoche. In Friûl i spetacui de Comedie de art no jerin rapresentâts di grups locâi ma di compagniis venezianis di passaç. E propit la mancjance des fondis culturâls de Comedie e sarà la cause dal fat che te nestre lenghe il teatri no si sedi svilupât fin tal secul XIX.

Di fat, il prin vêr test teatrâl par furlan al è dal 1847, cuant che Pieri Çorut al firme la comedie Il trovatore Antonio Tamburo.
Il Nûfcent al segne la nassite di tantis compagniis filodramatichis e dopo a son rivâts tancj scritôrs, autôrs di comediis lizeris, che a caraterizin il teatri furlan cun tescj sempliçs e divertents che a plasin une vore ae int.

Dome vie pes ultimis desenis di agns dal Nûfcent il teatri Furlan al rive a liberâsi, in part, dai contignûts tradizionâi par svicinâsi a lengaçs naratîfs modernis cirint di creâ une proprie identitât culturâl. Al è in chescj agns che a nassin lis primis iniziativis di formazion teatrâl che a puartaran, plui indenant, ae creazion di cualchi compagnie teatrâl di professioniscj.
Tal 2011 al è stât firmât un acuardi di colaborazion trienâl che al met dongje 14 sogjets, fra istituzions e ents teatrâi, par promovi il teatri in marilenghe: la “Farie Teatrâl Furlane“.

• Il teatri in lenghe furlane

  Lis primis formis di teatri regjistradis in Friûl a son lis Rapresentazions sacris, nassudis in France tor dal secul X e dopradis in clâf didatiche par spiegâ a la int la religjon e i siei misteris. Fin al 1300 però, no si cjate nuie che si puedi definî “teatri”, almancul daûr de concezion dal dì di vuê.

  Puartât fûr de glesie il lûc di rapresentazion, si bandone in maniere graduâl l’argoment sacri: il spetacul si trasforme in parodie comiche de vite par divertiment e si insiore di interpretazions intes lenghis volgârs. I prins tescj poetics in lenghe furlane a son de metât dal secul XIV. Si trate di doi contrascj amorôs in forme di sonet, cjatâts a Cividât: Biello dumnlo di valor e Soneto furlan. Il prin, scrit tant che un dialic a dôs vôs (masculine e feminine), al pues jessi considerât une semence di rapresentazion popolâr. Si à di rivâ fin al secul XV par cjatâ i prins tescj dramatics scrits ad implen par furlan, il Testament di Josef di Strassolt e Contrasto Homo e Dona di un anonim. Viodude la sô completece e organicitât, Testament al pues jessi considerât il test ae fonde dal teatri par furlan. E vâl po dopo la pene di marcâ il fat che, in chescj secui, lis rapresentazions teatrâls no si fasin in lûcs sierâts, ma ben tal viert, tes placis e sui sagrâts.

  I prins agns dal Cinccent a jerin stâts une vore dificii pal Friûl: tal 1508 la epidemie di peste, tal 1511 il riviel de Joibe Grasse e po dopo il taramot. Nol jere timp pai divertiments e, di fat, no si àn gnovis su lis rapresentazions teatrâls. Bisugne spietâ fin al 1563 par cjatâ un document dulà che si fevele di un spetacul: une comedie metude in sene a Udin, te sale grande dal Cjistiel.
  Tacant de metât dal 1500, si pues fevelâ di rapresentazions teatrâls metudis in sene di atôrs professioniscj, dentri di lûcs sierâts. Intai secui precedents, di fat, il teatri pal popul si lu faseve in place, biel che chel pai siôrs al jentrave dentri tai palaçs dai nobii di dut il Friûl. Dal 1550 indevant, invezit, ancje i comuns a àn tacât a concedi lis lôr salis consiliârs pes rapresentazions teatrâls.

  Tra il Cinccent e il Sîscent, in Italie e nas la Comedie de art che e rapresente il so timp, cun ducj i siei vizis e lis sôs virtûts, e che e met in sene spetacui alegorics ispirâts ae vite cuotidiane de epoche. Cu la Comedie de art a nassin lis primis mascaris, e il lengaç al devente simpri plui locâl e regjonâl. In Friûl, i spetacui de Comedie de art no son rapresentâts di grups locâi, ma di compagniis venezianis di passaç. Propit la mancjance des fondis culturâls de Comedie e sarà la cause dal fat che, te nestre lenghe, il teatri no si è disvilupât fintremai tal secul XIX. Si pues dî, duncje, che par assisti ae nassite di une leterature teatrâl in lenghe furlane si à di rivâ al 1800.

  Tal Votcent, e in particolâr tal 1848, il Friûl al ven coinvolt dome in part dai savoltaments politics e sociâi che a interessin il rest de Italie setentrionâl: stant che al è ancjemò sot de Austrie, il Friûl al reste al limit dai moviments rivoluzionaris e dai cambiaments culturâi risorzimentâi.
  Te prime metât dal secul XIX a son pocjis gnovis sui spetacui e su la produzion teatrâl in gjenerâl che, invezit, e à regjistrât un grant disvilup te seconde metât dal Votcent. Ancje la produzion teatrâl in lenghe furlane e scomence a sflorî dome dopo dal 1870. L’Autôr che al rapresente miôr chest periodi al è il poete Pietro Zorutti. La sô comedie alegoriche e di farse, Il trovatore Antonio Tamburo, comprensive di parts musicâls, cuant che e fo publicade tal 1847, e à rapresentât une vere novitât pe dramaturgjie furlane. Intal Friûl dal Votcent diviers scritôrs si son misurâts cu la poesie e, su la olme di Zorutti, cualchidun di lôr si è svicinât ae scriture pal teatri. Fra chescj si ricuardin Pacifico Valussi cu la comedie Sang no je aghe e Caterina Percoto cun La plui biele.

  Tai ultins agns dal secul la produzion teatrâl e devente consistente e ancje il teatri al tache a vê i siei cultôrs e i prins estimadôrs. I sogjets des comediis a son sempliçs, lis tramis plenis di ligrie e di bonspirt: a descrivin la vite contadine de cuotidianitât furlane. Ancje al inizi dal Nûfcent no si regjistrin grancj cambiaments: il teatri par furlan al leve daûr des liniis vuide dal secul precedent, al jere leât ae tradizion e al veve dome chê di fâ divertî. Cun di plui, lis dôs vueris mondiâls a vevin fermade la produzion teatrâl, massime chê in marilenghe. In realtât però, il Nûfcent al à segnade la nassite di tantis compagniis filodramatichis e, po dongje, di tancj scritôrs e autôrs di comediis lizeris che a àn caraterizât il teatri furlan cun tescj sempliçs e divertents, preseâts cetant da la int. E merete di jessi metude in evidence la fondazion a Gurize tal 1919 de Societât Filologjiche Furlane, che e à mostrât di subit di vê atenzion pal teatri.

  Tal 1921, in gracie dal segretari Ercole Carletti, e je stade fondade la Compagnie dialetâl furlane, che e à vût une part impuartante pe difusion dal teatri in dut il Friûl. Tal 1923 al è stât organizât il prin concors di tescj par furlan: la prime edizion le à vinçude Bruno Paolo Pellarini cu la comedie Nine nane. Il concors al è stât un sburt par chei scritôrs che a dopravin dome la lenghe taliane, a scrivi ancje par furlan.

  Une produzion plui struturade di tescj teatrâi in lenghe furlane e scomence daspò de seconde vuere mondiâl. Ae incressite economiche e sociâl si zonte, in chei agns, ancje la ricercje di une cressite culturâl; si tache cu li seradis di poesie, gjenar artistic là che la lenghe furlane e jere za plui doprade. Il test plui armoniôs e inmagant de leterature teatrâl furlane al viôt la lûs tal secont dopovuere: I Turcs tal Friûl. A scrivilu nol è un furlan di nassite ma di adozion, che dopo al deventarà un dal plui grancj poetis e oms di culture talians, Pier paolo Pasolini. Il drame I Turcs tal Friûl al è il so unic test teatrâl par furlan, scrit intal 1944 e publicât dome trente agns dopo, intal 1976, par cure di Luigi Ciceri. La opare e conte lis vicendis di un paîs dilunc des invasions turchis dal 1499, zovantsi di chest event par contâ la storie pui resinte dal secont conflit mondiâl e par fâ travanâ la storie bibliografiche dal autôr. I turcs, però, a diference de produzion poetiche di Pasolini in marilenghe che e à tant condizionât e stimolât i poetis e scritôrs locâi, a restin une opare isolade e che no ven cjapade di ispirazion di chei altris autôrs.

  Jenfri i agns Cincuante e i agns Setante si metin lis basis pe rinassite dal teatri furlan, intindût tant che un strument par disvilupâ il dibatit coletîf e la cussience identitarie. I autôrs a capissin che no si pues plui fevelâ dal passât ma che si à di cjalâ il presint, lis sôs problematichis e lis sôs rivendicazions. Ae fonde di chest procès di rinovament a son i lavôrs di Alviero Negro e di Renato Appi. Negro al pues jessi considerât il prin pionîr dal gnûf “teatri di roture”: la denunzie, l’impegn, la contestazion a son lis peraulis clâf de sô produzion dramaturgjiche. Disingjan e roture che si cjatin ancje te grande produzion di Renato Appi. Chest gnûf model di teatri al à cjatât lis resistencis dal public che, par solit, al jemplave lis salis par divertîsi e par ridi. Al è scomençât cussì un procès impuartant, par creâ une gnove cussience tai spetatôrs, par fâur capî il rûl sociâl dal teatri. Un contribût fondamentâl al rinovament de sene teatrâl furlane, ancje par chel che al tocje l’ûs de marilenghe, al ven dât dal grup Risultive, che al veve propit il fin di valorizâ la lenghe furlane in ogni setôr leterari e comunicatîf: lenghe tant che strument di rivendicazion di une maniere di jessi, di une culture e de identitât.

  Tai agns ’70 si regjistre une ativitât ferbinte des compagniis teatrâls e di rassegnis. Come che al aferme Lelo Cjanton (Aurelio Candoni), “la ativitât teatrâl par furlan si è simpri davuelzude pe grande passion dai diretôrs e dai atôrs diletants, cence mai che lis autoritâts a vessin pensât di creâ un teatri professionist”. Il moviment pal ricognossiment dal teatri in marilenghe e pe nassite di un teatri stabil par furlan, di un teatri fat di professioniscj, al nas tor de fin dai agns Setante.
  Tacant di chescj agns, il teatri furlan al rive a liberâsi, in part, dai contignûts tradizionâi, par svicinâsi a lengaçs naratîfs modernis, cirint di creâ une proprie identitât culturâl. Dongje di une sperimentazion tematiche, si è metude in vore ancje une sperimentazion linguistiche: par esprimi contignûts gnûfs si veve di doprâ une lenghe divierse di chê tradizionâl. La inovazion introdusude di Negro, Appi, Candoni, e je leade ae transizion sociâl e economiche che e travierse il Friûl, e che e tocje ancje il teatri. Tra lis robis che plui a maravein di chest rinovament e je propit la impuartance dade al aspiet linguistic, considerât simpri plui centrâl e tant che strument identitari.

  I prins doi tescj cuntun alt valôr dramaturgjic scrits in lenghe furlane a son Strissant vie pe gnot, di Luigi Candoni dal 1974, e I Turcs tal Friûl, scrit di Pier Paolo Pasolini za tal 1944, ma publicât dome tal 1976. Une opare che e à marcât un confin te storie de dramaturgjie furlane moderne: la sô rapresentazion fate tal 1996 pe regjie di Elio De Capitani, e je une piere miliâr che e segne la nassite dal teatri moderni furlan.

  In chei agns, e par chei seguitîfs, e je stade po fondamentâl la produzion di Gianni Gregoricchio, che al è rivât a dâi al teatri furlan ce che i mancjave, o ben la dramaturgjie dal personaç.

  Il teatri furlan contemporani al pues contâ, dongje di une schirie di compagniis teatrâls amatoriâls cetant ativis sul teritori, su atôrs professioniscj formâts ancje midiant de Civiche Academie di Art Dramatiche Nico Pepe, vierte a Udin tal 1988. Dongje de Academie a van po ricuardadis lis ativitâts di altris istituzions impuartantis pal disvilup e pe promozion dal teatri in marilenghe: l’Ent Regjonâl Teatrâl dal Friûl-Vignesie Julie (ERT), il CSS Teatri Stabil di Inovazion e il Teatro Club di Udin.
  Un ricognossiment speciâl al va a Elio Bartolini, scritôr e senegjatôr di fame nazionâl, che intal 2000 – insiemi cun Paolo Patui – al scrîf Bigatis, opare teatrâl preziose su la cundizion des feminis in Friûl tai prins dal Nûfcent.

  Tal 2011 al è stât ancje firmât un acuardi di colaborazion trienâl che al à metût dongje 14 sogjets, fra istituzions e ents teatrâi, par promovi il teatri in marilenghe, par rinfuarçâ e par dâ continuitât ae produzion di tescj e di spetacui teatrâi professionâi: la Farie Teatrâl Furlane.

  Ator des istituzions nomenadis culì sore, a son nassudis realtâts impuartantis tant che il Teatro Incerto, il Teatrino del Rifo, la Accademia degli Sventati, e si son formâts autôrs e atôrs contemporanis aromai storics de sene furlane, tant che Franco Marchetta, Paolo Patui, Massimo Somaglino, Carlo Tolazzi, Andrea Collavino, Aida Talliente, e tancj altris.

  Par furlan, vuê si metin in sene spetacui di ogni gjenar: de sperimentazion ae satire, passant pe critiche sociâl. Ancje il teatri pe infanzie al à vût un biel disvilup, graciis al impegn e ae creativitât dai autôrs plui zovins.

  Par chel che al inten il teatri amatoriâl, si à di ricuardâ la Associazion Teatrâl Furlane (ATF), nassude intal 1986 cul fin di valorizâ a ducj i nivei la lenghe, la culture e il teatri furlan. Dongje dai spetacui, la ATF e organize ancje cors di formazion e un concors bienâl di tescj teatrâi par furlan. A vuê, e ten dongje passe 60 compagniis sparniçadis tes trê provinciis furlanis.

• Farie Teatrâl Furlane

  Descrizion
  Tal 2011 al è stât firmât un acuardi di colaborazion trienâl (2011-2013) che al à metût dongje 14 Ents daûr de iniziative de Provincie di Udin par lavorâ te stesse direzion: realizâ un progjet che si clame “Farie Teatrâl Furlane” cun chê di rinfuarçâ e di dâ continuitât ae produzion di tescj e di spetacui teatrâi professionâi che a tocjin la culture e la lenghe furlane. Par chescj Ents al jere strategjic promovi une azion di sisteme in chest setôr, disvilupant colaborazions indreçadis a integrâ lis carateristichis vocazionâls di ognidun dai sogjets cjapâts dentri. Cu la cussience che tal teritori a son artiscj, interpretis, operadôrs teatrâi cun capacitâts cetant buinis, che a vignaressin valorizâts cuntune azion di produzion dramaturgjiche e di spetacul cun caratar di continuitât, di promovi ancje fûr regjon midiant di relazions za in vore e di gnûfs contats. Ducj chescj a condividevin la convinzion che la scriture pal teatri e fos un at concret che al à bisugne di une verifiche costante cun palc di sene, atôrs e regjiscj. Ducj a ricognossevin la impuartance dal sisteme teatrâl amatoriâl. I Ents e i sogjets che a àn aderît a jerin: la Provincie di Udin, la ARLeF, il CSS Teatri stabil di inovazion dal F-VJ, l’Ent Regjonâl Teatrâl, la Civiche Academie di Art Dramatiche Nico Pepe, la Fondazion Teatri Gnûf “Giovanni da Udine”, il Comun di Udin, la Universitât dal Friûl, la Fondazion CRUP, la Societât Filologjiche Furlane, la Associazion Teatrâl Furlane, il Teatro Club Udine, la Associazion Mittelfest, il Conservatori Statâl J. Tomadini. Jenfri chescj, la ARLeF e jere stade individuade di ducj i Ents che a àn firmât il protocol tant che il sogjet gjestôr des ativitâts de Farie Teatrâl Furlane.

  Ativitâts metudis in vore e apontaments

  Friuli e altrove – serade di poesie furlane
  Spetacul di teatri di poesie par furlan e par talian, realizât cul Teatri Gnûf “Giovanni da Udine”, su la produzion artistiche di trê poetis furlans contemporanis, Pierluigi Cappello, Ida Vallerugo e Leonardo Zanier.

  Parole per la scena – breve viaggio nella produzione teatrale di Elio Bartolini
  Une iniziative che e conte la opare di Elio Bartolini dramaturc, cuntune schirie cetant curade di intervents critics, leturis senichis e proiezions video.

  Publicazion e distribuzion di Bigatis
  Publicazion e distribuzion di n. 1500 copiis dal DVD dal spetacul di teatri Bigatis di Bartolini e Patui.

  Video di Pieri da Brazzaville
  Realizazion di un video sul spetacul Pieri da Brazzaville, trasmission su la programazion RAI, publicazion e distribuzion di n. 1000 copiis dal DVD.

  Produzion, preparazion e debut al Mittelfest di “SIUMS”
  Spetacul a pontadis cun diviers autôrs e regjiscj, indreçâts di un coordenadôr-regjist, e almancul dîs atôrs par furlan, par meti in vore (cun debut al Mittelfest 2012) il spetacul “Siums”.

  Distribuzion dal spetacul di teatri Pieri da Brazzaville
  Il spetacul al è za stât presentât tal Teatri Gnûf “Giovanni da Udine” il mês di Avrîl e al sarà programât tes stagjons serâls dal ERT (Tisane, Manià, Glemone, Çarvignan e Udin – Teatri “Palamostre”); cun di plui al sarà presentât pes scuelis di Glemone e Tisane.

  Distribuzion dal spetacul di teatri Il Sium di une Patrie – I ultins dîs di pre Checo Placerean
  Il monolic, scrit e interpretât di Fabiano Fantini, al conte i ultins agns di vite di pre Checo Placerean, il grant predi furlan, autonomist, teolic, animadôr de sene politiche e culturâl dai agns ’60-’70. Il spetacul al à debutât ai 23 di Novembar dal 2011 al Teatri “San Giorgio” di Udin. L’obietîf al è chel di distribuîlu in almancul altris cinc teatris dal teritori.

  Riduzion e traduzion teatrâl dai tescj di autôrs furlans par tirâ fûr il test dal spetacul SIUMS
  Coordenament de ricercje dramaturgjiche par rivâ ae realizazion dal spetacul SIUMS. Al vignarà fat un lavôr di individuazion, riduzion, adatament teatrâl e eventuâl traduzion dai tescj di autôrs furlans che a coventin par meti in sene il spetacul. Plui autôrs a fasaran la traduzion/riduzion e in dut a vignaran fats almancul cinc episodis.

  Laboratori di dramaturgjie
  Laboratori di dramaturgjie par furlan, pai students des scuelis superiôrs, de Universitât e pai arlêfs-atôrs dal Pali Teatrâl Studentesc “Città di Udine”, cul obietîf di scrivi tescj origjinâi di, al plui, sessante minûts. Organizazion e coordenament di une jurie tecniche, cul compit di selezionâ un grup di cuatri tescj al massim. Presentazion publiche dai cuatri tescj selezionâts in forme di reading-mise en espace, cul coinvolziment di atôrs zovins no professioniscj, individuâts e preparâts di bande di doi operadôrs di teatri, une vore esperts te conduzion di grups teatrâi di zovins e di students. I cuatri reading a saran proponûts in plui localitâts dal teritori a un public che al fasarà di jurie popolâr. Il test che al vinçarà al podarà jessi metût in sene inte stagjon dal prossim an, par cure di ents produtôrs tierçs di individuâ.

  Ricercje e publicazion “Il teatro friulano”, prime part
  Si vûl publicâ une opare che e sedi buine di meti dongje e di promovi, in mût sistematic, i autôrs e lis testemoneancis teatrâls par furlan, dal ‘800 incà. Il prin volum al rivuardarà autôrs e tescj dal ’800 ai prins dal ’900.

  Publicazion “Il Teatro in lingua friulana: microstoria di un repertorio”
  Realizazion de publicazion su lis cuatri lezions-spetacul inmaneadis dal Teatri Gnûf “Giovanni da Udine” e dal “Teatro Club” di Udin, curadis e condusudis di Angela Felice e di Paolo Patui inte stagjon 2009/2010.

  Formazion – Cors di Perfezionament par atôrs in Lenghe Furlane
  La Civiche Academie di Art Dramatiche “Nico Pepe”, inte suaze dal progjet “Farie Teatrâl Furlane”, e met in prin plan la dimension linguistiche dulà che si incrosin dôs prospetivis, une leade al teritori e chê altre ae Europe, parcè che si pense che pal futûr al seti impuartant savê “meti a fûc” a diviersis distancis: par chest, la sielte di aprofondî e di incentivâ il teatri in lenghe. Chest al favorìs la cressite di un atôr che al agjìs e che al resone intun contest slargjât e une vore vari, svilupant la sô flessibilitât e dutilitât. In particolâr, il studi dal furlan al è un fatôr che al insiore e che al favorìs un contat cun altris lenghis europeanis. Tal cors di teatri in lenghe furlane de “Nico Pepe” si doprin tecnichis espressivis inzornadis, un metodi di lavôr rigorôs e professionâl, elements di inovazion tant tes sieltis su la dramaturgjie, che su la regjie. Il cors di perfezionament par atôrs in lenghe furlane al à l’obietîf di inzornâ professioniscj e operadôrs che a lavorin sul teritori dulà che la produzion par furlan e je vivarose e slargjade. I cors a tratin lis tecnichis di recitazion, la recitazion in viers, la antropologjie teatrâl, la dramaturgjie, e a vuelin jessi un moment di cressite inte formazion dai atôrs pal svilup de “Farie Teatrâl Furlane”.

---