fbpx

“Universi Diversi” di Franco Daneluzzi

Il Comun di San Vît dal Tiliment e la ARLeF, Agjenzie Regjonâl pe Lenghe Furlane, a organizin, inte suaze di “Incuintri cu la poesie furlane”, la presentazion dal libri “Universi Diversidi Franco Daneluzzi, une racuelte di poesiis in lenghe furlane e taliane. 
A saran presints par puartâ il lôr salût il President de ARLeF, Eros Cisilino e il Sindic di San Vît dal Tiliment, Antonio Di Bisceglie. Introduzion di Anna Maria Chiarotto. A dialogaran cul autôr: Emanuela Zamparo, Pier Carlo Begotti, Eddi Bortolussi, Fabio Dessole. Leturis di Mariella Collovini e Gilberta Antoniali.

L’apontament al è par Joibe ai 19 di Setembar aes 20.30, li de Biblioteche Civiche di San Vît dal Tiliment. 

Il volum al è une racuelte di poesiis in lenghe furlane (cu la traduzion par talian in bande). La sielte dal autôr di esprimisi inte sô marilenghe e je il segn di un leam profont cu lis sôs lidrîs. Nus propon musis, lûcs, mistîrs di une vite lontane, nus conte la sô storie: la infanzie di cui che al veve pôc ma che dut câs si sintive siôr, la zoventût ae ricercje di un futûr miôr, la soference pal abandon de cjase native; ma ancje l’amôr intes sôs diviersis formis: di fi, di inamorât, di pari e di nono.

Franco Daneluzzi al è nassût a San Vît dal Tiliment tal 1945. Ex emigrant in Svuizare, al è stât insegnant di scuele professionâl e si è svicinât ae poesie in graciis di Leonardo Zanier, che cun lui al à colaborât par cualchi an inte formazion professionâl. Cumò al vîf tra il Venit e il Friûl.



Stanus Daûr

Components ARLeF

ARLeF

Agjenzie Regjonâl pe Lenghe Furlane

vie della Prefettura, 13

33100 Udin

tel. +39 0432 555812

codiç fiscâl: 94094780304