PRESEADIS E PRESEÂTS
AL È CUN PLASÊ CHE US SEGNALÌN LIS INIZIATIVIS

La Agjenzie Regjonâl pe Lenghe Furlane e sarà presinte ancje chest an
te suaze de edizion 2021 di Friuli Doc,
la manifestazion enogastronomiche plui impuartante de regjon.

Joibe ai 9 di Setembar, aes 21.00, te cort di Palaç Morpurgo
al larà in sene "Ombris tal infinît", une leture cun musichis e imagjins su la poetiche di Carlo Sgorlon, un spetacul teatrâl in lenghe furlane produsût dal Teatro della Sete cul finanziament de ARLeF.

La leture seniche in lenghe furlane e rint omaç ae poetiche
dal innomenât scritôr furlan Carlo Sgorlon.
Vôs, musichis e dissens a crearan un spetacul multimediâl
che al riflet la concezion dal mont e la sensibilitât di Sgorlon.

Cun di plui, si podarà preseâ la presince de ARLeF a Friuli Doc
ancje in ducj i menûs e i materiâi di comunicazion
che a “fevelaran” ancje par furlan!

La jentrade al spetacul e je libare ma bisugne prenotâsi a chescj contats: info@sportelfurlan.eu - 0432 1743400

La Fieste de Patrie dal Friûl e torne in presince, domenie ai 12 di Setembar dal 2021 a Udin, dentri de manifestazion Friuli Doc.
E sarà une ocasion une vore emozionante par celebrâ in comunitât i valôrs culturâi e linguistics dal popul furlan e afermâ la sô identitât.

L'event al è organizât dal Comun di Udin,
cu la poie de Regjon Friûl-Vignesie Julie e de ARLeF
e in colaborazion cul Istitût Ladin Furlan "Pre Checo Placerean",
e al e ricuarde la nassite dal Stât Patriarcjâl di Aquilee,
istituît ai 3 di Avrîl dal 1077.

Il program de zornade al è une vore siôr.
Aes 09.45 la bandiere dal Friûl e vignarà esponude su la specule dal Cjistiel. Aes 10.30 si celebrarà in Domo la S. Messe par furlan,
cun leturis ancje par sloven e todesc,
par sierâ, aes 11.45, cu la cerimonie civîl in place Libertât.
Il dut al sarà acompagnât de esecuzion dal Imni uficiâl dal Friûl,
di bande de Arte Voce Ensemble, direzude di Franca Drioli,
e de leture de bole imperiâl di bande dal grup storic di Glemone.


Par lei il program complet de manifestazion