Tignît di voli il canâl 103.
Al è culì, di fat, che i furlans a podaran sintonizâsi par viodi la gnove programazion televisive par furlan inmaneade de RAI regjonâl.
L’acuardi tra la Presidence dal Consei e la RAI,
in vore dal 1ⁿ di Otubar dal 2020 fin ai 21 di Avrîl dal 2021,
al à zontât pe prime volte 30 oris intun an di trasmissions televisivis par furlan, adun cuntun potenziament de produzion radiofoniche,
che e passe di 90 a 120 oris.

Rai 3 bis (canâl 103) al trasmet ogni martars programs
in lenghe furlane par grancj e par piçui, in dôs fassis orariis di pueste.

Des 14.20, dopo dal TGJ regjonâl, une selezion di cartons animâts par furlan e puartarà ligrie e divertiment intai dopodimisdîs dai plui piçui.
Inte fasse serâl invezit, des 21.50 aes 22.20, la ufierte culturâl e je pardabon varie. A laran in onde spetacui teatrâi, films, videos e sitcoms par furlan. Tra chescj il spetacul teatrâl une vore resint produsût de ARLeF e presentât al Mittelfest 2020, Giorgio Mainerio, un misteri furlan; i films Predis. La nazione negata e Missus di Massimo Garlatti Costa e altris colaborazions di presi che a rindaran la lenghe furlane une protagoniste gnove e impuartante pal palinsest de Rai.

Dutis lis trasmissions a laran in repliche ogni vinars:
chês pai fruts aes aes 14.20 e chês dal palinsest serâl aes 21.40.

Par cognossi tal detai la programazion

A van indenant i progjets de ARLeF
par imparâ la lenghe furlane cun zûcs e divertiment.
Il prin al è Il Libri di Maman!, un progjet editoriâl ludic didatic realizât de ARLeF e promovût adun cul Ufici Scolastic Regjonâl.
I volums, un pes classis 1^e e 2^e, e chel altri pes classis 3^e, 4^e e 5^e, a son stâts dâts fûr in 20.000 copiis a 180 istitûts dal teritori furlanofon.
Zûcs, filastrocjis, proverbis, curiositâts, tescj leteraris e conseis di leture…
a ufrissin un bon supuart e divertent ai arlêfs des scuelis primariis
tal aprendiment de lenghe furlane.
In curt al sarà distribuît ancje tes bibliotechis.

Par savênt di plui, cliche achì

La innomenade trasmission televisive Maman! e je rivade ae 5^e stagjon
e e fasarà compagnie ai plui piçui fin al mês di Jugn dal 2021.
Condusude di Daria Miani, la serie si insiore de rubriche
“La Pueste di Maman!”, che e rispuint aes domandis e aes curiositâts
dai fruts di cjase, e un gnûf carton animât, Rite & Cjossul,
che al conte lis aventuris di Rite e dal so cjanut.

Maman! al va in onde su Telefriuli ogni vinars aes 18.30,
e in repliche la domenie aes 7.00 e aes 13.00.

Par savênt di plui, cliche achì.

De sinergjie tra la ARLeF e la Direzion Salût de Regjon Friûl - Vignesie Julie
e je nassude la version in lenghe furlane
de Campagne pe vacine 2020/2021,
impuartante par sensibilizâ i citadins in chest moment delicât.
Lis locandinis, dadis fûr in dutis lis Aziendis Sanitariis e intes scuelis primariis dal teritori furlanofon, a ricuardin che la vacine antiinfluençâl e je gratuite e conseade a fuart ai adults e ai fruts cun malatiis cronichis,
aes personis che a àn 60 e plui agns, aes feminis in gravidance,
ai fruts di 6 mês ai 6 agns e al personâl sanitari.

Par savênt di plui