O vin il plasê di informâus che in chescj dîs si è inviade
in ducj i ples scolastics dulà che si insegne la lenghe furlane
la distribuzion dai volums di "Anìn!", 
il prin manuâl pal insegnament
de lenghe e de culture furlane te scuele primarie.
 
La operazion di distribuzion si davuelzarà dentri de fin di Novembar,
cu la consegne dai volums in ogni ples scolastic
pai arlêfs impegnâts tes lezions
di lenghe furlane par l' a.s. 2022/2023.
 
I insegnants di furlan, invezit, a ricevaran une copie dai manuâi,
adun cu lis “Liniis vuide pai docents” (utilis par favorî l’ûs coret dai volums)
li dai lôr Istitûts comprensîfs.
 
"Anìn!" al è un progjet de ARLeF,
realizât cul supuart de Regjon Autonome Friûl-Vignesie Julie,
che al segne un passaç fondamentâl tal insegnament dal furlan
e pal avignî de nestre lenghe.

Si compon di doi volums:
Anìn! 1, pensât pe didatiche des classis I e II
e Anìn! 2, dedicât aes classis III, IV e V.
 
I manuâi, curâts de professore Rosalba Perini
adun cuntun grup di esperts e di docents
coordenâts di Edizioni didattiche Gulliver,
a inserissin il curicul di/in lenghe furlane
tal percors didatic tradizionâl de scuele primarie,
dant ai arlêfs gnûfs struments e prospetivis di cognossince.