Preseadis e Preseâts

Al è cun plasê che Us segnalìn lis iniziativis

INT/ART, la seconde serie
in onde su rai 3

tacant dai 25 di març dal 2018

Il progjet INT/ART, realizât de societât Agherose
cul contribût de ARLeF (Agjenzie Regjonâl pe Lenghe Furlane)
e dal Fonts Regjonâl pal Audiovisîf, al rive ae seconde serie.

Dopo il sucès de prime serie dedicade ai protagoniscj de musiche,
la seconde e cjape in considerazion il mont des arts visivis:
de fotografie ae sculture, passant pal fumet, pe grafiche
e pe art instalative e performative.

Graciis ae colaborazion cu la sede Rai pal Friûl - Vignesie Julie,
lis pontadis a laran in onde su RAI3 cun chest calendari:
Edi Carrer (scultôr), domenie ai 25 di Març, aes 10.50, Rai 3; 
in repliche, miercus ai 28 di Març, aes 22.05, Rai 3 Bis CH. 103;
Alice Durigatto (fotografe), domenie il 1n di Avrîl, aes 10.50, Rai 3;
 in repliche, miercus ai 4 di Avrîl, aes 22.05, Rai 3 Bis CH. 103;
Carin Marzaro (ilustradore), domenie ai 8 di Avrîl, aes 10.50, Rai 3;
 in repliche, miercus ai 11 di Avrîl, aes 22.05, Rai 3 Bis CH. 103;
Michele Bazzana (artist visîf), domenie ai 15 di Avrîl, aes 10.50,
Rai 3; in repliche, miercus ai 18 di Avrîl, aes 22.00, Rai 3 Bis CH. 103;
Luca Malisan (fumetist), domenie ai 22 di Avrîl, aes 10.50, Rai 3; 
in repliche, miercus ai 25 di Avrîl, aes 22.05, Rai 3 Bis CH. 103.

Il progjet INT/ART al stimole une riflession su la influence e sul rûl che
la identitât linguistiche e culturâl e à pai zovins creatîfs,
indagant cetant che la lenghe e puedi determinâ une
sensibilitât artistiche divierse e trop che al puedi jessi complès esprimile intune lenghe minoritarie.

Fracant chi, o podês savênt di plui

tresesin, il prin comun
a meti in vore il PSPL

il plan speciâl di politiche linguistiche

Il comun di Tresesin al è il prin in regjon a indotâsi dal
Plan Speciâl di Politiche Linguistiche 2018 - 2022,
ancje graciis ae colaborazion de ARLeF pe definizion dal Plan.
La aministrazion locâl e rispiete cussì ce che al è previodût
de L. R. 29/2007 "Normis pe tutele, valorizazion
e promozion de lenghe furlane".

Dopo de aprovazion dal Plan Gjenerâl di Politiche Linguisitiche,
la ARLeF e je lade indevant a progjetâ une schirie di "buinis pratichis" dulà che e jentre ancje la preparazion di diviers modei di PSPL
che a son a disposizion dai sogjets interessâts.

La Agjenzie si augure, duncje, che altris comuns furlans
a fasin compagn, intal rispiet de normative in vore,
dai dirits linguistics dai citadins e inte plene cussience
dal valôr di une identitât vierte e moderne,
ma fondade su la ricjece de culture e des lenghis dal teritori.