Ancje te edizion 2022 dal Festival di Cividât,
la lenghe furlane e je protagoniste, in graciis de colaborazion
tra ARLeF, CSS Teatro Stabile di innovazione del FVG e Mittelfest
che a puartin in sene in prime assolude il spetacul teatrâl
"Maçalizi - Il dio del massacro".

Ai 29 e ai 30 di Lui, cun doi spetacui par sere aes 19.30 e aes 21.00,
tal claustri di Sant Francesc, al sarà duncje pussibil assisti
ae version furlane di "Le Dieu de carnage" di Yasmina Reza,
pe regjie di Fabrizio Arcuri e Rita Maffei,
cun Fabiano Fantini, Rita Maffei, Massimo Somaglino, Aida Talliente.
Il test al è stât voltât par furlan di William Cisilino e Michele Calligaris.

La prime assolude di un spetacul
che al conte la storie dal confront e dal scuintri tra dôs fameis
intun contest borghês, dulà che il furlan si disvelarà tant che
la lenghe dai sintiments e dai istints plui vêrs

Par savênt di plui sul spetacul e pai biliets

Il protagonist de serade dai 25 di Lui a Mittelfest al sarà "Rosada!",
spetacul in lenghe furlane - in sene aes 10.00,
tal Convitto Nazionale Paolo Diacono di Cividât.
Une produzion Teatri Stabil Furlan in colaborazion cun
ARLeF - Agjenzie Regjonâl pe Lenghe Furlane e Mittelfest 2022.

Midiant des "Poesie a Casarsa" di Pier Paolo Pasolini,
il spetacul al indaghe il colegament tra la peraule e la dibisugne di tramandâle;
al resone sui confins tra tiere e lenghe, tra apartignince e distac,
par discuvierzi un Pasolini inedit
e une lenghe che si fâs musiche.

Cu la partecipazion straordenarie di Paolo Fresu,
de vôs di Nicola Ciaffoni, dal cjant di Elsa Martin
e des sonorizazions di Giulio Ragno Favero.
Dramaturgjie e regjie a son di Gioia Battista,
di une idee di Caraboa Teatro.


Par savênt di plui sul spetacul e pai biliets

A Aquilee al à viert il gnûf Sportel Regjonâl pe Lenghe Furlane,
un pont di riferiment pe promozion dal furlan
in dute la Basse furlane.

Cheste scree e rive in graciis de colaborazion sinergjiche
tra la ARLeF, midiant dal so Sportel, il Comun di Aquilee
e lis realtâts di chest teritori.

I Sportei presints sul teritori
(a Udin, Tumieç, San Vît dal Tiliment e Gurize, in plui che chel di Aquilee)
a son un pont di riferiment par ducj i ents locâi par garantî
ai citadins l'esercizi plen dai dirits linguistics
e la posizion dal gnûf Sportel Regjonâl pe Lenghe Furlane de Basse
e à un significât particolâr, stant che Aquilee e rapresente
la scune de identitât linguistiche e culturâl furlane.

Il Sportel di Aquilee al sarà viert al public:
il lunis, des 09.00 aes 13.00 e des 13.30 aes 17.30;
il martars e il vinars, des 09.00 aes 13.00

Par contatâ il Sportel, si pues clamâ il numar 0431 916919
o scrivi a basse@sportelfurlan.eu

Par plui informazions