La Cuesture di Udin, cul supuart preziôs de ARLeF
e in colaborazion cul CSS di Udin,
e à realizât une campagne di prevenzion
in lenghe furlane cuintri des trufis,
presentade dal Cuestôr di Udin e dal President de ARLeF,
cul intervent dal Assessôr regjonâl aes Autonomiis locâls.

Obietîf de campagne de Polizie di Stât - che si indrece in particolâr
ai plui anzians - al è chel di sensibilizâ i citadins a ricognossi il pericul
e a vê un compuartament cussient par evitâ di jessi imbroiâts.

A son stâts duncje realizâts cuatri videos, dulà che
il messaç al è veicolât par furlan - lenghe mari de plui part dai anzians -
par trasmeti informazions claris e diretis, confuartâju,
e rinfuarçâ il sens di fiducie tai confronts des fuarcis dal ordin.

I protagoniscj a son i innomenâts atôrs furlans
Catine, e Fabiano Fantini, Claudio Moretti, Elvio Scruzzi
dal Teatro Incerto, bogns di meti in alerte i citadins ancje cul lôr humor.

Si trate di une iniziative cuntun valôr sociâl fuart,
che e met la atenzion su moments di vite che a tocjin ducj
e che e smire a fâ jentrâ lis buinis pratichis di prevenzion
te vite di ogni dì: un procès favorît dal ûs de lenghe furlane.

Cjale i videos de campagne e...sta in vuaite!