La trasmission dedicade ae lenghe furlane curade de ARLeF e torne cun gnovis pontadis. Ogni sabide fin ai 9 di Novembar in onde su Telefriuli.
Cinc speciâi dedicâts ae lenghe furlane, ae nestre storie e aes arts dal Friûl in graciis dal contribût di ospits e esperts in studi cu la conduzion di Chiara Donada, intervistis, aprofondiments e video.
Tacade ai 12 di Otubar cu la repliche de pontade trasmetude ai 3 di Avrîl, in ocasion de Fieste de Patrie dal Friûl, dedicade ae storie dal Friûl e ae nassite dal stât patriarcjâl furlan, la programazion e continue:
- ai 19 di Otubar aes 21.45: pontade dedicade al cine e tal specific ae vision dal film "I Dismenteâts de Transiberiane" di Christiane Rorato, sui emigrants furlans partîts pe Siberie (produzion Prelude Media). In studi Christiane Rorato, Carlo Gaberscek e Livio Jacob.
- ai 26 di Otubar aes 21.45: pontade dedicade al teatri in lenghe furlane, al Teatro Incerto e ae vision dal spetacul “Blanc”, une comedie divertente e sincire su la crisi dal nestri timp (produzion CSS Teatro stabile di innovazione del FVG). In studi Fabiano Fantini, Claudio Moretti e Elvio Scruzzi.
- ai 2 di Novembar aes 19.30: pontade dedicade ae lenghe furlane, aes sôs origjins, carateristichis e leterature, ai imprescj informatics par scrivile e ae tutele des lenghis minoritariis. In studi William Cisilino, Francesca Battistutta e Marco Torresin.
- ai 9 di Novembar aes 19.30: pontade dedicade ae educazion plurilengâl, al insegnament dal furlan a scuele, e ae lenghe furlane tal teatri, tal cine e te musiche. In studi William Cisilino, Francesca Battistutta e Marco Torresin, cul contribût des intervistis a Clara Putelli, Enza Purino, Paolo Patui, Massimo Somaglino, Alessandro Di Pauli, Dorino Minigutti, Valter Colle e Doro Gjat.
Stanus daûr sui nestris canâi!
|
|