Vinars ai 18 di Jugn, des 17.30, il President de ARLeF, Eros Cisilino
al parteciparà al event "Diecimillanta" a Spilimberc cuntun intervent
sui progjets editoriâi in lenghe furlane pe infanzie
de Agjenzie Regjonâl pe Lenghe Furlane.


L'intervent  "Lei par furlan: tantis storiis pai fruts di doman"
si insuaze te manifestazion "Diecimillanta"
che e celebre i 10 agns di "Crescere Leggendo",
un progjet di educazion ae leture dai 6 ai 11 agns
ideât e promovût de associazion Damatrà che tai agns
al à vût ancje la poie de Agjenzie.
 

Par dutis lis informazions

La Agjenzie Regjonâl pe Lenghe Furlane e rive
pe prime volte a “dialoghi”, il festival itinerant
dal gjornalisim e de cognossince che al à l'intindiment
di contribuî a disvilupâ une cussience coletive,
in graciis dal confront.

Il prin apontament firmât ARLeF al è pai 20 di Jugn a Insic di Cormons
pe presentazion di “La storie di Lolo il…” ,
un classic de leterature israeliane pai fruts
che al conte di amicizie, fiducie e rispiet, e al è voltât di Davide Turello
par furlan dal origjinâl ebraic.

La presentazion e je par cure dal diretôr de ARLeF, William Cisilino
e dal critic leterari Mario Turello
adun cun Gabriele Zanello, docent di leterature furlane
de Universitât dal Friûl.
 

 
Par dutis lis informazions

O gjoldarìn de compagnie dai amîs di Maman!
ancje vie pal Istât!

Cui 18 di Jugn, ogni setemane a van in onde su Telefriuli
dôs replichis de cuinte edizion di Maman!,
la innomenade trasmission televisive par fruts dute par furlan.

Se vie pal an tu ti sês pierdût cualchi pontade,
segniti lis zornadis
di vinars aes 18.30 e di domenie aes 09.15.

Cun di plui, al va indenant l'apontament
cui cartons animâts in lenghe furlane: Telefruts
si pues viodi dal lunis al vinars aes 17.45, simpri su Telefriuli.

 
Cjale dutis lis stagjons di Maman!