fbpx

“Macbettu”, la tragjedie di Shakespeare e va in sene par sart

Adatament in lenghe sarde de opare shakespeariane “Macbeth”.

Il spetacul in lenghe sarde “Macbettu” di Alessandro Serra al rive a Udin daspò di une lungje e fortunade tournée ator pe Europe, Asie e Americhe Latine, e al vignarà metût in sene al Teatri Gnûf “Giovanni da Udine” sabide ai 2 di Novembar dal 2019, aes 20.45 (cun soretitui par talian). Adatât de innomenade opare mestre di William Shakespeare “Macbeth” di Serra istès, che al cure la regjie e la senografie, il spetacul al à concuistât il public e la critiche pe fuarce de sô composizion dramaturgjiche e pal ûs magnific de lenghe sarde.

La regjie esplosive di Alessandro Serra e met adun tradizion e sperimentazion, traspuartant lis vicendis dal Baron di Glamis di une Scozie medievâl intune Sardegne cence timp, barbare e violente, creant analogjis imprevedibilis tra la opare mestre shakespeariane e lis mascaris de Sardegne. I vot interpretis masculins cui lôr cuarps a crein lûcs e a evochin parencis, e ogni component di sene al contribuìs a une atmosfere visionarie, tragjiche e ancestrâl. Ma la fuarce espressive e viamente de opare teatrâl e dipent soredut de lenghe sarde, che «e trasforme intune melodie ce che par talian al riscjarès di pierdi impuartance deventant leterature», dit cu lis stessis peraulis dal regjist – mostrant cussì ancjemò une volte il podê liric e evocatîf des lenghis minoritariis.

© Alessandro Serra

L’incuintri cul public a jentrade libare “Terra, voce e lingua” al anticipe la metude in sene serâl, che si tignarà li dal Spazi Fantoni dal Teatri Gnûf “Giovanni da Udine” aes 17.30, che al viodarà l’intervent dal regjist Alessandro Serra, di Giuseppe Bevilacqua, diretôr artistic di Prosa Teatri Gnûf “Giovanni da Udine”, dal diretôr de British School FVG Peter Brown e di Maria Sciola, de Fondazion “Pinuccio Sciola”.

Consulte i materiâi

Ogjet Cjale
Macbettu_locandine


Stanus Daûr

Components ARLeF

ARLeF

Agjenzie Regjonâl pe Lenghe Furlane

vie della Prefettura, 13

33100 Udin

tel. +39 0432 555812

codiç fiscâl: 94094780304