Cun vinars ai 8 di Otubar e tache la seste stagjon di "Maman!",
che e larà in onde su Telefriuli ogni vinars, aes 18.30,
e in repliche la domenie, aes 07.00 e aes 13.00.

La trasmission e torne cuntune grande sorprese:
il gnûf carton animât "Horaci l’Inuit".

Une serie catalane, voltade par furlan in graciis de ARLeF,
che lu à produsût su licence di Videoplugger Ltd, e curade di Delta Studios
e dal CSS Teatro Stabile di Innovazione del FVG.

I protagoniscj dal carton animât, Horaci e Sedna,
a son doi eschimesuts che a fevelin par furlan
e che a vivin aventuris di ogni sorte ator pal Artic.

I gnûfs amîs, e ducj i protagoniscj di Maman!,
us spietin ogni setemane cun tantis rubrichis par imparâ,
scuvierzi e divertîsi par furlan!

Par savênt di plui

Cul mês di Otubar dal 2021, a son tornâts a tacâ in presince
i Cors pratics di Lenghe e Culture Furlane,
organizâts de Societât Filologjiche Furlane cul finanziament de ARLeF.

Lis lezions si davuelzaran in tancj Comuns dal Friûl,
par un totâl di 26 oris par cors,
dulà che si studiarà la gramatiche e la grafie de lenghe furlane,
ma ancje aspiets storics, culturâi, leteraris.

I cors a son gratuits e vierts a ducj
e si fasaran tal rispiet de normative anti Covid-19.

Par savê cemût notâti e viodi dut il calendari dai Cors Pratics

In graciis de colaborazion cu la ARLeF, il centri comerciâl Città Fiera
si impegne te promozion e te valorizazion de lenghe furlane.

Lu fâs in particolâr midiant de presentazion
di doi concors in lenghe furlane, patrocinâts de ARLeF,
che si indrecin soredut aes scuelis (ma no dome!).

Il prin concors, pes scuelis de infanzie e primariis,
si clame "Premia la tua classe" e al previôt une sezion dute dedicade
ae lenghe furlane cul premi speciâl de ARLeF
sul teme "Un viaç tal mont dai golosets".
La Agjenzie e premiarà une classe par ogni categorie dal premi
(chê dal dissen e chê tai tescj)
cuntun bon di 250 euros par comprâ materiâl didatic.

Il secont concors, che si inviarà cui 11 di Otubar,
si clame "La peraule dal cûr" e al invide lis scuelis dal teritori
e dutis lis personis che a vuelin partecipâ - in particolâr i zovins -
a mandâ la peraule o la conte dal cûr par furlan, cu la motivazion.
In premi une gift card Città Fiera dal valôr di 150 euros.

Par savênt di plui