Si invie cun vuê, lunis ai 30 di Setembar dal 2019,
la impuartante campagne di promozion e di informazion
realizade de ARLeF - Agjenzie Regjonâl pe Lenghe Furlane

“Al dipent di nô”
che e à tant che obietîf chel di stimolâ il public, e in particolâr i zovins,
a deventâ atîfs tal alimentâ e tal sostignî la lenghe furlane
cuntun so ûs cussient e cuotidian.

La programazion e je articolade su
tv, radio, stampe su cjarte, web e social,
sui autobus urbans e extraurbans di Udin e de provincie,
intes stazions feroviariis di Udin, Gurize e Pordenon
e in cualchi centri comerciâl.

Cun cheste campagne si vûl ancje fâ cognossi la ARLeF
e i servizis che e ufrìs, furnî informazions su la lenghe e su la sô tutele
e difondi l'ûs dai tancj struments informatics creâts
par facilitâ l'ûs dal furlan ancje sui gnûfs media.

Ducj nô o sin protagoniscj
tal fâ vivi la lenghe furlane:
al dipent ancje di te!