Fieste de Patrie dal Friûl: grant sucès pe edizion dal 2019 che si è davuelte a Gurize

Gurize e je stade sielte tant che sede de Fieste de Patrie dal Friûl 2019, 942 agns dopo de nassite dal Stât patriarcjâl furlan.

L’event si è davuelt domenie ai 7 di Avrîl.

Come par tradizion, i moments plui impuartants a son stâts chei de esposizion de bandiere da Friûl in Plaza Granda, de celebrazion de Sante Messe par furlan te glesie di San Roc e de cerimonie civîl.

Lis autoritâts presintis

A son stadis tantis lis autoritâts presintis ae leture de bole imperiâl che, ai 3 di Avrîl dal 1077, e faseve nassi il Stât patriarcjâl furlan e, fra di lôr, passe trente sindics cu la fasse tricolôr, cu la presince ancje dal sindic di Udin, Pietro Fontanini. Presints ancje, dongje dal sindic di Gurize, Rodolfo Ziberna, che al à dât il bon acet, Lorenzo Zanon, president dal Istitût Ladin Furlan “pre Checo Placerean”, il president de Assemblee de comunitât linguistiche furlane, Diego Navarria e diviers conseîrs regjonâi.

Dopo la celebrazion de messe par furlan, te glesie di Borc San Roc, la cerimonie uficiâl si è davuelte tal centri culturâl “Incontro” là che, tra l’altri, al è stât fat il scambi de bandiere dal Friûl fra il Comun di Voleson Darzin, che al veve ospitât la edizion dal 2018 de Fieste, e chel di Gurize.

Lis premiazions

Cun Paola Cencini, dal Ufici Scolastic Regjonâl, e je stade fate subit dopo la premiazion des scuelis che a àn partecipât al concors “Emozions furlanis in viaç pal teritori”: la scuele de infanzie di Rivolt; la scuele primarie “Matiz” di Çurçuvint e la scuele secondarie di prin grât “Pellegrino da San Daniele”.

I coridôrs de Stafete

Grant il moment conclusîf, infin, cu la rivade dai coridôrs de “Stafete pal Friûl” promovude de ARLeF, in colaborazion cu la Associazione Sportiva Maratonina Udinese. I cirche 100 atletis, partîts di Marian te buinore, a vevin traviersât Romans dal Lusinç, Migjee, Cormons, Caprive, San Lurinç e Mosse, par dopo finî il lôr percors propit a Gurize.

Le prossime edizion de Fieste de Patrie dal Friûl si tignarà a Udin.



Stanus Daûr

Components ARLeF

ARLeF

Agjenzie Regjonâl pe Lenghe Furlane

vie della Prefettura, 13

33100 Udin

tel. +39 0432 555812

codiç fiscâl: 94094780304