A son un centenâr i cartons animâts par furlan che la ARLeF e met a disposizion dai fruts in chestis setemanis di passâ a cjase. Pensant a lôr, la Agjenzie e à anticipât la metude in linie de gnove serie Rite & Cjossul, 26 episodis che a contin lis zornadis di Rite, une frute di cinc agns, e dal so cjan Cjossul, pegri e cuiet, che al è bon di fevelâ. Il carton animât al è une produzion gjaponese, gjavade fûr dai libris ilustrâts “Rita et Machin”, publicâts par francês di Gallimard Jeunesse.
La serie si zonte a chês altris za a disposizion sedi inte sezion Fruts di chest sît che sul canâl YouTube dedicât: Omenuts, la serie innomenade fate de Fisher-Price (Mattel) che e à tant che protagoniscj cinc piçui amîs e lis lôr storiis sioris di emozions; Tui e Tuie, doi gjatuts simpatics, fradi e sûr, che midiant di une scjate magjiche e di une imagjinazion ferbinte a vegnin traspuartâts lontan di cjase e a vivin aventuris plenis di sorpresis e di scuviertis; La Pimpa, la simpatiche cjiçute blancje a balins ros, nassude dal lapis di Altan.
A son prodots di cualitât, pensâts par fâ divertî i fruts ma che a risultin ancje bogns par rindi chest periodi di timp, là che si à di restâ a cjase, une ocasion educative.
La sezion Fruts dal sît e je un tesaur siôr di tancj altris materiâi “anti-stufe”: dentri a son dutis lis pontadis de trasmission Maman!, adun cun flabis, libris e audiolibris, files musicâi cun filastrocjis e cjançonutis, dissens di piturâ e zûcs interatîfs.
